Dr Tanvi Raksam Marak Miss Grand India 2026-o 2nd runner up-ko man·a

TURA: Dr Tanvi Raksam Marak, (MMBS passed, NEIGRIHMS, Shillong) Miss Grand India 2026-o 2nd runner up-ko man·aha.
Miss Grand India 2026-ni Grand finale-ko May 12 tariko Delhi-ni Talkatora Stadium-o ong·atangaha. Uano India-ni dingtang dingtang state aro union territory-rangoni sak 30 bak ra·aha. Uamang gimikan a·doktangtangni Miss Grand-ko man·giparang ong·a. Susaanio uamang a·doktangtangko represent ka·aha.
Uandake Dr. Tanvi Raksam Marak Meghalaya-ko represent ka·aha. Indake sak 30-oni Dr. Tanvi, top 6-ona sokange susaanio 2nd Runner Up-ko man·aha.
Unbaksana ua Miss Elegant aro Miss Cultural Wear award-koba man·aha. Ian A·chik jatna, Meghalaya a·dokna aro North East gimikna rasong chabeani ong·a.
Una sikangrangba Dr. Tanvi 2018 bilsio Miss Cherry Blossom-ko man·aha, Sunsilk Mega Miss North East-ko 2019 bilsio man·aha, Miss Meghalaya-ko 2019 bilsio man·aha, VLCC Femina Miss India Meghalaya-ko 2020 bilsio man·aha aro Miss Grand Meghalaya-ko 2026 bilsio man·aha.
Dr. Tanvi Raksam Marak All India Garo Union-ni (HQ. Shillong) President, Elbarth Marak aro Adriana Raksam Marak-ni nokdango atchiaha. Uo ba·rimarang sak 4 gnang. Abitang sakgni aro nogipa saksa. Sikanggipa abitang Tenaz Raksam Marak( MA & LLB ) gnigipa Nafisa Raksam Marak (MBA) aro nogipan Dr Taziana Raksam Marak (MMBS passed, NEIGRIHMS, Shillong) ong·a. Dr. Tanvi Marak Riprap band-ni Legendary Rockstar, Mr Browny R. Marak-niba namchiktang je·et ong·a.