TURA: Re·baenggipa July 26-31 tarikona Australiani Sydney-o ong·atenggipa 13-gipa Commonwealth Youth Parliament (CYP13)-o Garo Hills-oni Nandini Ishvi O. Sangma India a·songni pal ong·e bakko ra·na gita seokako man·aha, indake ian A·chik A·songna, uandake Meghalayana namen rasong chabeani ong·aha.
Nandini, Tura Don Bosco College-ni Political Science chatri ong·a, ua India-ni gipin sakbonga delegate-rang baksa international youth leadership programme-o bak ra·anggen. Ia mingnamgipa international programo Commonwealth A·songrangoni bilsi 18-29 ong·gipa chadamberang re·bae bakko ra·nasienga.
Ia bilsini batanggimin March jani 2 aro 3 tarikona Meghalaya Legislative Assembly aro Tura Christian College baksa nangrime skanggipa changna Garo Hills-o Youth Parliament-ko District Auditorium, Tura-o ong·atanggipao uni name dakanio pangchake CYP13-o bak ra·na gita uko seokaha, jean ua programo ‘‘Best Speaker’’ award-ko man·ahachim.
Commonwealth Youth Parliament-ko ong·atenganiara parliament-ni kamrangko chadamberangna skie on·an baksa parliament-o jera ra·ani, dilgipa ong·na skie ra·ani parliament-ni niamrangko u·ie ra·na miksonge ong·atengani ong·a.
Indake puclic officer-rango dangdike on·na sikgipa aro jinmani dilgipa ong·na sikgipa chadamberangko tarina gita miksonganio ia Commonwealth Youth Parliament-ko ong·atenga. Parliament-o dakgnirangni bidingo, sorkariko sason ka·ani bidingo, legislative debate-rangko dakani, aro democratic-ni bewalo parliamentary session-rangko chalaiani bidingo chadamberangna skie on·gen aro interactive discussion-rangba donggen.
Australia-o ong·atenggipa Youth Parliament-o Nandini Sangma Indiani pal bakko ra·gen
Date:
Share post:
