Bilsi 3-ni gisepo Meghalaya Skills Program-na kr 80-ko koros ka·aha: CM
SHILLONG: Budbar salo, Meghalaya sorkarini Labour, Employment & Skill Development Department, Skills Meghalaya aro Meghalaya State Skill Development Society (MSSDS) baksa nangrime, Skillerate 2026 program-ko Shillong songjinmani NEHU-o ong·atangaha aro ia program-ko ong·atanio a·dokni Chief Minister Conrad K Sangma, a·dokni chadamberangna kam ka·e cha·ani aro bading chiwalani cholrangko bariate, kamrangni bidingo skie on·aniko mangrakbatatna gita program mingbriko a·bachengate on·angaha.
Skills Meghalaya-ni ning·o Chief Minister-ni a·bachengate on·anggipa program mingbriara, PROPEL, MEGASKILL, SHIELD aro EQUIP ong·a. PROPEL, ian training ba skie on·nako man·gimin chadamberangna, dingtang dingtang bosturangko aro cholrangko on·anichi chadamberangna dakchake on·ani ong·a, MEGASKILL-ara, 2028 bilsio Japan a·songo ong·atna sienggipa WorldSkills competition-ona chadamberangko tarisoani, SHIELD-ara, noko sagiparangna ba butchuma budeparangna simsak nirokaniko on·na skie on·ani aro EQUIP-ara, be·enni gita cholgri ong·giparangna apsan gadango jakni kamrangko skie on·ani ong·a.
Ia tom·anio a·dokni Chief Minister aganprakangengon, ia program-ko sorkarini a·bachengate on·gipa program-rangoni mongsongbatgipa ine janapatenba, janggi tangani cholrangko bikote on·anian a·doko mingsa rakbatsranggipa ra·biani ong·enga ine parakataha.
Meghalaya a·doko songdongenggipa manderangoni 50 percent-mangni gitade bilsi 20-ni ning·o ong·gipa chadamberangan ong·a aro bilsiantian sak 60,000-mangni gita chadamberang kamrangko ka·na re·ongkatenga ine janapatengon, re·baenggipa bilsirango iana bateba kamrangko sandigipa chadamberang bang·batgnok aro ian sorkarina rakbegipa kam ong·enga ine Chief Minister aganaha.
Iandakgipa program-rangna 50 percent-mangni gitade, Asian Development Bank (ADB)-ni dakchake on·enggipa externally aided project ning·o dakchakaniko man·enga ine janapatengon, ia tangkarangoni 80 percent-mangkode India sorkarisa gampilenga aro tangka paisarangko gampilanio a·dok sorkaride bang·e gampilna gita nangja ine Chief Minister talataniko on·angaha.
Iandakgipa program-rangoniko hajalni hajal chadamberang namgniko man·aha ine janapatskaengon, ia chadamberangna training-rangko on·e, uamangna janggi tangani cholrangkosan on·aigija, kamrangko nakatna gitaba man·skaengaha ine Chief Minister aganaha.
Iandakgipa program-rangko ong·atanichi bang·a chadamberangan, dingtang dingtang biaprango kamrangko ka·e cha·na cholrangko man·engaha ine janapatengon, sak 19 chadamberang tourism-o skie ra·e, Mumbai songjinmani JW Marriot-o kamko man·aha aro sak 30-mangni gita chadamberang, Japanese ku·sikko skie ra·e da·o Japan a·songo kamko ka·na chol man·engaha ine Chief Minister parakataha.
Chief Minister-ni aganani gitade, kamrangko skie ra·na aro certificate-rangko man·engoba bang·bata chadamberangan, kamrangko a·bachengna gita bosturangko brena aro gipin nanga dakchakanirangko man·rongjani gimin sorkari, ia program-ko a·bachengataha.
Dingtang dingtang kamni kri bosturangkoba suale on·anggen ine janapatengon, ia program-ko a·bachengatanichi, sak 21,000-mangni gita program-o skie ra·enggipa chadamberang namgnirangko man·gen aro bosturangnamangmangan gong crore 24 korosko hisape donaha ine Chief Minister parakataha.
Batanggimin bilsi gittamni gisepo, Meghalaya Skills Program-na gong crore 80-mangni gita tangka paisarangko koros ka·aha ineba Chief Minister parakataha.
Chadamberangna aro be·enni gita cholgri ong·gipa manderangna jakni kamrangko skie on·anio bakrimengani gimin ua, Labour Department, MSSDS aro dingtang dingtang dolrangkoba mittelpilangaha.
Ia program-ko ong·atanio, a·dokni Labour, Employment & Skill Development Minister Methodius Dkhar-ba aganprakangengon, kamrangko skie on·anio ia mingbri program-ko a·bachengataniara a·dokna mingsa chu·sokani ong·aha ine aganenba, dingtang dingtang kamrangni bidingo skie on·anichi sorkari, chadamberangna janggi tangani cholrangko on·angkugen ine ku·rachakaniko on·angaha.
