TURA: North Garo Hills a·jani bazar antirango dokkan dake cha·enggipa aro dingtang dingtang bading chiwalanirangko dake cha·enggipa gipin jatrangoniko Trading for Non-Tribal (TNT) licence-rangko sandirokchina ACHIK Northern Zone, Garo Hills Autonomous District Council (GHADC)-ko didiataha.
North Garo Hills a·jao niam gita bading chiwale cha·enggipa manderangna ja·mano official verification letter-rangko sualatchinaba ACHIK didiataha.
Iani bidingo GHADC-ni Chief Executive Membor (CEM) Dhormonath Ch Sangma-na sedoatengon, “North Garo Hills a·jani dingtang dingtang bazar antirango, bading chiwale cha·enggipa mitam manderangde, skangonin bading chiwale cha·enga indiba TNT licence-rang dongskaja. Bazar antirango gipin biaprangoni re·bae bading chiwalgiparangba donga aro iandakgipa manderang, TNT licence-rangba dongja aro darangni permit-rangkoba ra·ja. Una agreba, North Garo Hills a·jao, para salenggipa mitam garirangba TNT licence gri salenga,” ine ACHIK Northern Zone-ni co-chairman Rorok R Marak parakatenba, bading chiwale aro gari para sale cha·enggipa gipin jat gimikonikon TNT licence-rangko sandirokchina aro official verification letter-rangko on·china didiataha.
North Garo Hills a·jao niam gri bading chiwale cha·enggipa manderangko champengatanichi, ia jolrango Tribal-rang an·tangtangan jakgitele aro nambate bading chiwale cha·na cholko man·gen ineba ACHIK Northern Zone-ni co-chairman, GHADC-ni CEM-na sedoatgipa chittio parakataha.
