SHILLONG: Meghalaya sorkarini Information Technology & Communications Department, NASSCOM baksa nangrime Bristibar salo, NASSCOM Industry Leaders Meet 2026-ko Shillong songjinmani State Convention Centre-o ong·atangaha aro ia program-ko ong·atanio a·songni dingtang dingtang biaprango donggipa industry-ni dilgiparang, technology company-rang aro dal·dalgipa official-rangba bak ra·angtokaha.Ia program-ko ong·atanio, Shillong Technology Park-II-o biapko para ra·na gita StaffFlex Resolutions LLP aro Meghalaya Technology Parks Society-ni gisepo soi ka·grikanikoba dakangjolaha.
Ia program-ko ong·atanio Meghalaya a·dokni Chief Minister Conrad K Sangma-ba dongpae jinma chanchirimanio bak ra·angengon, a·doko Information Technology (IT)-ni kamrangko namdapatna ka·enggipa kamrangni gimin janapangaha.2008 bilsio uni IT Minister ong·engmiting somoirangonin ua a·doko IT-ko tang·doatna cholrangko sandiengachim ine janapatengon, 2018 bilsio uni skanggipa changna Meghalaya-ni Chief Minister ong·e re·bapilon, a·doko IT-ni kamrangko mangrakbatatna uamang kamrangko ka·na a·bachengpiltaiaha aro da·alo a·dokni skotong Shillong songjinmao gnigipa IT Park-ko tarimanaha aro Tura-oba damgipin IT Park-ko kulina kamrangko ka·engaha ine Chief Minister parakataha.
Ia program-ko ong·atani miksonganiko talate on·angengon, IT-ni kamrango bak ong·enggipa industry-rang, training institute-rang aro dingtang dingtang dolrangko apsan ong·ate, Meghalaya a·doko chu·sokaniko ra·bana an·tangtangni cholrangko ma·sie ra·china miksonganian ong·a ine Sangma aganaha.
Sorkari baksa bakrimenggipa industry-rangni agan-ku·pattie on·anirangko aro kamrangko bakrimaniko on·angkuchina gitaba Chief Minister didiangaha.
Ia program-ko ong·atanio, BPM, IT-ni dilgiparang baksaba a·dokni Chief Minister, Meghalaya a·doko digital economy-o tang·doatani bidingo chanchirimangaha.
