SHILLONG: Meghalaya Police-ni kamrangko nambate ka·na man·na gita bol 95 gital garirangko breaha aro ia garirangko Bristibar salo, a·dokni Chief Minister Conrad K Sangma, Shillong songjinmani Golflink-o donggipa Police Officers’ Mess-o a·bachengate on·angaha.
Ia garirangko a·bachengate on·anganio a·dokni Director General of Police (DGP) Idashisa Nongrang, sorkari official-rang, police officer-rang aro Meghalaya Police-o kam ka·enggipa gipin manderangba bak ra·angtokaha.
Ia tom·anio official-rangni u·iatani gitade, Police department-na gimik bol 95 gital garirangko breaha aro ianoni bol 79 garirangkode, Central Assistance to State Police Scheme-ni ning·o India sorkarini on·atgipa tangka paisarangchi breaha.
Gital bregipa police garirangoni, bol 20-de Maruti Jimny, bol 19-de sipairangko salgipa Tata truck, bol 5-de Mahindra mini truck, bol 19-de sak 20 sipairangko salna biap donggipa bus, bol 10-de sak 24 sipairangko salna biap donggipa bus, bol 8-de sak 36 sipairangko salna biap donggipa bus aro bol 8-de CID-rangna Tata Yodha garirang ong·a aro ia garirangko breanio gong kror 30-mang koros ong·aha ineba official-rang parakataha.
Ia tom·aniko ong·atanio, a·dokni Chief Minister Conrad K Sangma aganprakangengon, sorkariko chalaianio niam retirangni mongsonggipa ong·ani gimin janapangenba, a·dokni police dolrangko mangrakbatatna gita sorkari dingtang dingtang cholrangchi kam ka·enga ine parakataha.
Gital chasongni kri Police dolrangko namdaproroatna sorkari gisik on·e kamko ka·enga ine janapatengon, Police department-ko mangrakbatatanian sorkarini mongsonggipa daitorangoni mingsa ong·a ine Chief Minister aganaha.
Police Reserve Fund gita dakgipa kamrangni gimin janapangengon, iandakgipa ja·kurangko de·anichi nosto ong·gimin police station, outpost aro beat house-rangko da·o nambate taridapna man·aha aro mongsongbatede ia kamrangko Superintendent of Police (SP)-rangna aro unit commander-rangna pakwate on·anichi, kamrangko ta·rakbate chu·sokatna man·engaha ine Chief Minister aganaha.
Police department-na nangdapenggipa sak 3000-na baten sipairangko ra·ahani gimin janapatskaengon, ian a·dokni Police dolrang, kamtangtangko ka·anio nambate chu·sokatna man·na gita sorkarini on·kange kam ka·aniko mesokani ong·aha ine Chief Minister aganaha.
Ia bol 95 gital garirangko gong kror 30-mang koros ong·e breaniara Police dolrangni kamrangko mangrakbatatna chol on·anian ong·enga ineba ua aganaha.
Jillarangosan ong·aigija diltugipa biaprangoba police station, outpost aro border outpost-rangko nambatate, police-rang donatna gita sorkari kam ka·enga ineba Chief Minister aganaha.
So·sojengjeng ong·ani somoirango tom·tomaniko rakkina kam ka·anio police-rangni chagrongna nanggipa neng·nikanirangko janapatengon, namgipa bewal aro chakchikani gnang kamrangko ka·engani gimin Chief Minister, Meghalaya Police-ko mittelpilangaha.
A·dokni pilak biaprangon niam retiko rakkina gita an·tangtangko on·kange kamrangko ka·engani gimin ua a·dokni DGP Idashisha Nongrang aro Meghalaya Police gimikkon mittelpilangaha.
