Rehabilitation Centre-rangko bang·dapatchina WGH-ni DC-na ADE sedoa

TURA: Garo Hills-o Drugs jakkalgipa aro uko watna man·gijagipa chadamberang bang·roroengani gimin uamangko sana bananiko on·e dakchakaniko on·a gita Rehabilitation centre-ko rikchina Association for Democracy and Empowerment (ADE), Apex Committee Meghalaya, HQ, Tura,  West Garo Hills, Deputy Commissioner-na seachi u·iata.
Uamangni seatgipa chittio janapani gitade, a·jao chadamberangni Drugs aro gipin pekgipa bosturangko jakalgiparang bang·roroenganichi ramram manderangna, nokdangna aro songsarna nangchakeako man·enga aro Awareness program on·anirang chu·ongjaenganichi bang·a chadamberang drugs-ni ja·gao nange nampilna neng·nikani ong·tokenga jechin uamangni poraianio aro mikangchi re·mikanganina jajrengani ong·enga ine u·iataha.
Drugs jakaljringe uko watna man·gijagipa chadamberangna sana banana cholrangko on·a gita Rehabilitation Facilities-rang Garo Hills-o chu·onga gita dongja ine janapatskaengon, da·alo Garo Hills-o rehabilitation centre chu·onga gita dongja aro donggenchimoba chel·a biaprangosa ong·ani aro re·ruraanio tangka paisarangna neng·nikaniko man·ani gimin bang·a nokdangrangan drugs watna man·gijagipa dedrangko sangija don·a nangtokenga ine janapangaha.
Drugs jakaljringanichi mande so·otani ba dosi dakanirangko a·doko bariata, chadamberangni kamgri ong·ani batroroa aro nokdangna aro songsarna neng·nikaniko ra·baa. Jensalo drugs jakalaniko watna man·jahaon uamangni daka rikani bewalrangna aro uamangni be·en bimangna kenchakanirang donga.
Chadamberangni drugs jakaljringaniko komiatna man·ode a·jao namgija kamko ka·aniko, kamgri ong·aniko aro songarni aro nokdangni neng·nikanirangko komiatna man·gen ine janapatskaengon, drugs addict-rangko ta·rake nampilatna man·a gita songsaro aro dingtang dingtang biaprango drugs ba pekgipa ringa cha·aniko jakaljringani namgijako mikrakatani programrangko ong·atjringna nangenga, aro ma·a paarang ba nokdangni manderang iano bak ra·na nangenga.
Unbaksa Garo Hills-o Rehabilitation Centre-rangko nangdapkuenga aro rehabilitation centre-rangko rikengon uno Detoxification units, dongchakani, sana bananiko on·gipa aro drugs addict-rangna nama ku·patianiko on·gipa manderangko dona nanga jedakode uamangko ta·raken nampilatna man·gen.
Unigimin drugs jakale bang·a neng·nikaniko chagrongenggipa Garo Hills-ni chadamberangna uamangna dingtang man·cha sana bananiko on·a nangchongmotengani gimin Rehabilitation centre-rangko bang·bate rikchina Association for Democracy and Empowerment (ADE), Apex Committee Meghalaya, HQ, Tura, Deputy Commissioner-ko didiangaha.