BAGHMARA: SGH a·jani ning·o ga·akgipa Nongal- Jadi-oniko Gasuapara-ona koela salenggipa dal·dalgipa truck garirang skulni somoio sorokko re·ruraenganichi jolo songdongenggipa manderangna, mongsongbate skulo poraienggipa chatro chatrirangna kenchakaniko ra·baani ong·enga ine jolni manderang suk ong·gijaniko parakataha. Iani bidingo Nipon Marak-ni parakatani gitade, dal·dalgipa truck gariango walni somoio Jadi-oniko koelarangko Baghmara-ona salbae uko pringni 7 bajimangni somoirango Gasuapara-ona pangnan salrongenga. Ia somoirangara bang·a skulo poraienggipa chatro chatrirangni skulchi re·-ani somoi ong·a aro ian soroko ma·gipa paa-gipa gri an·tangtangari skulchina re·enggipa chatro chatrirangna ken-chakani ong·enga ine parakataha. Dal·dalgia koela garirangni sorokrang gita pringni skul re·ani somoirango salenganiara, bi·sarangna rang·gitik rama a·sel ong·anirangna kenchakan baksana ian mandeni janggina kenchakaniba ong·a, maina songadam nokadamrango bang·bata ma·a paarangan dedrangko skulrangchina dilrongtokja aro bang·a chadamberangan ja·arangchi ia apsan sorokgitan skul-rangchi re·tokenga. Jolo songdonggipa manderangni neng·nikaniko ma·sichake, skulo porai-enggipa chatro chatrirangni naljokanina, koela salgipa truck-rangko pringo skulni somoirango watgija walni somoirango watskachina SGH a·jani daito gnanggiparangko Marak mol·molataha.
