India aro B’desh-ni gisepo bading chiwalgrikaniko tangatpilchina Conrad nangnika

NEW DELHI: India aro Bangladesh a·songni gisepo bading chiwalgrikaniko tangatpilna nangenga ine Meghalaya a·dokni Chief Minister Conrad K Sangma janapatenba, a·song damgnini gisepo bading chiwalaniko a·bachengpiltaina gita joltangtangni gisepo agangrikaniko a·bachengataha ine parakataha.
Iani bidingo kobor ra·timgipa manderang baksa agangrikengon, skangonin Bangladesh a·songni neng·nikanirangko chagrongna nangmiting somoirangoba India a·song dakchakanirangko on·rongani gimin a·song damgnini gisepo bakrimaniko manderangna u·iatna nangenga ine Chief Minister parakataha.
2024 bilsio Bangladesh a·songo so·sojengjeng ong·angani ja·man chipe donatgipa border haat-rangko kulipiltaina nangengani giminba Chief Minister janapangaha.
India aro Bangladesh a·songni gisepo agangrikanirangko dakna miksonganirang dongama ine sing·anina aganchakaniko on·engon, “A·song damgnini gisepo bading chiwalgrikaniko a·bachengpiltaina gita joltangtangni manderang agangrikna a·bachengengaha,” ine Sangma aganaha.
Re·baenggipa June jani 11 aro 12 tarikrango Shillong-o ong·atna sienggipa North East India Infrastructure Summit & Exhibition-na do·gako oe on·angani ja·man ua, ia kattarangko aganaha.
“Bangladesh a·song baksa da·o ong·enggipa golmalrangara dikdiksanasan ong·aia ine anga ka·donga maina an·ching Bangladesh a·song baksa kamrangko ka·rimna nangaigen. Ian India a·songna aro Bangladesh a·songnaba namgni ong·a aro anga bebera·a a·song damgnini bakrime kamko ka·anichi bang·en namgni aro cholrangko ra·bana man·gen,” ine Chief Minister aganaha.
Bangladesh a·song baksa re·a doani cholrangko taridapanichi, salgro salaram a·dokrango economy-ko tang·doatna man·gen ineba Sangma aganaha.
Bangladesh a·songni rama gita West Bengal a·dokni Hili-oni Meghalaya a·dokni Mahendraganj-ona rama jal·langrangko taribana miksongenggipani gimin janapatengon, Chittagong port-ona ramako tarianichi salgro salaram a·dokrango bading chiwalaniko tang·doatna man·gen ine Chief Minister aganaha.
Niam gri napsrukbagiparangna jajrengtokengani gimin janapatskaengon, rakgipa niamrangko ra·gatanichi, niam gri napsrukanirangko champengskana nanggen ine Sangma aganaha.
Manipur a·doko dingtang dingtang jatrangni dinggrikanirangko namatchipna man·jaengani gimin sing·anina aganchakaniko on·angskaengon, ian namen rakbegipa ra·biani ong·enga ine Sangma aganaha.