SHILLONG: Shillong-ni Lok Sabha MP Dr Ricky AJ Syngkon-ni tanggitik siangani ja·man da·o ong·atna nangenggipa Shillong Parliamentary by-election-na Election Commission, tarikrangko parakatani ja·mansa Bharatiya Janata Party (BJP)-ni candidate-ko biming minggen ine BJP Meghalaya-na ku·wattimgipa Mariahom Kharkrang parakataha.
Iani bidingo kobor ra·timgipa manderang baksa agangrikengon, Shillong Parliamentary by-election-ko ong·atna Election Commission-oni tarikrangko tik ka·ani ja·mansa BJP-ni candidate-ko jinmana parakatgen ine Kharkrang aganaha.
Candidate-ko parakna gita maini gimin somoi ra·chaenga ine sing·anina aganchakaniko on·angengon, “Iandakesa BJP-de kamrangko ka·a. Batanggimin chang election-oba chinga election-ni tarikrangko parakatani ja·mansa candidate-rangko mingaha aro iako na·simangba nika. Uni gimin party-ni parakatanina na·simang chakchike sengkubo,” ine BJP-ni dilgipa aganaha.
Shillong Lok Sabha by-election-o susana gita kamrangko ka·samsochina ma·mongni party dilgiparang, a·dokni dilgiparangna ge·etaniko on·atmanaha indiba by-election-o susana gita candidate-kode, election-ni bidingo parakatani ja·mansa Central Parliamentary Board seokanggen ine adita salrangna skangsan, BJP-ni state general secretary Wankitbok Pohshna-ba parakatahachim.
Shillong parliamentary by-election-o BJP-ni tikitchi susana gita da·o dipet saksni manderangni dorgastorangko man·soaha ine u·iatengon, mikkangchi gipinrangba party tikitna dorgastoko galangkunaba gnang aro da·o dipet candidate-rangko bakkandikatkujaenga ine Pohshna aganaha.
2024 bilsini Parliamentary election-ode BJP susagija, NPP-ni candidate-na chakpaaniko on·skaahachim ine nikna man·a.
Indake ong·genchimoba 2024 bilsio, Shillong Lok Sabha seat-ko Voice of the People’s Party (VPP) aro Tura seat-ko Congress cheskaahachim.
Koborko on·ani gitade, Shillong Parliamentary by-election-o BJP-ni tikitchi susana gita BJP-ni state spokesperson Mariahom Kharkrang, gitcham state president Ernest Mawrie aro Jaintia Hills-ni adita sak dilgiparangkoba mingsoani dongachim.
Shillong Lok Sabha by-election-o susana gita National People’s Party (NPP)-de Khasi Authors Society (KAS)-ni president Dr DRL Nonglait-ko aro Voice of the People’s Party (VPP)-ba party-na ku·wattimgipa Batskhem Myrboh-ko parakatmanahachim.
Congress dolba Shillong-ni gitcham MP aro MPCC-ni president Vincent Pala-kon susaatpiltaina miksongenga.
Da·o dipet United Democratic Party (UDP)-de ia by-election-o susagenma susajawa name tik ka·kujaenga.
