BAGHMARA: South Garo Hills a·jani Rongarao Rongdi chibimako kasotgipa sil-ni dolong namedake ka·ja, songni manderangna re·ruraanio jakkaltogipa ong·ani pal batesa kenchakna nanganisa ong·enga ine aganan baksa ia dolongko tarigiparang chu·gimik tangka paisarangko jakkalgija ine matnange Garo Hills Youth Solidarity (GHYS), Meghalaya Lokayukta Court-o badi ka·doangaha.
Indake ia suspension bridge-ko name kaja ine matnange badi ka·ani ja·mano, ia dolongko bakan taridape on·gen ine BADO official ku·rachakangaha.
Indake ia dolongko rikanio jak donggipa manderangni kosako ming 20 a·selrangko janapenba badi ka·angaha aro a·jani ning·o badiaba project-rangko matchotgija donchipanirangko nikangkuode, Enforcement Directorate (ED), Central Bureau of Investigation (CBI), aro Lokayukta court-ona ra·anggen aro iandakgipa manderangni contractor ong·ani bilko den·galchina gita department ge·antina sedogen Garo Hills Youth Solidarity (GHYS), Rongara Unit-ni president Barthazar G Momin mikrakatani kattarangko aganaha.
