Mominin-na jamin on·ode A·chik dilgiparangnaba on·na nanga ine dabia
TURA: Re·anggipa March jao Garo Hills-o so·sojengjeng ong·anina rim·ako man·gipa Phulbari-ni gitcham MLA SG Esmatur Mominin-na kacharini jaminko on·ahani gimin Robibar salo Tura-ni MDC aro Bharatiya Janata Party (BJP)-ni state vice president Bernard N Marak, suk ong·gijaniko parakatenba, Mominin-na jamin on·anio a·dokni Chief Minister Conrad K Sangma aro a·dok sorkari jak dongama ine sing·doataha.
Garo Hills-o so·sojengjeng ong·anina rim·ako man·gipa Phulbari-ni gitcham MLA Esmatur Mominin aro GHADC-ni gitcham MDC Sofior Rahman-ni kosako police-rang, charge sheet ka·jahani gimin sing·doatengon, “Ia dilgiparangko wate, A·chik NGO-ni dilgiparangko rim·e donaniara, a·dok sorkarini mikkang niteaniko mesokanisa ong·enga. Tribal-rangna on·gimin bilrangko warachakenggipa A·chik dilgiparangko rim·e donenba, Mominin aro Rahman gita dakgipa dilgiparangko watpilanichi a·dok sorkari, gipin jatrangnasa chakpaaniko mesokengama?” ine Marak sing·doataha.
Ia Muslim dilgiparang, gipinrangni dakchakanichi, social media gita ding·chaoataniko ra·baaha ine janapatengon, Tura-ona re·bana skang Mominin an·tangan Chief Minister baksa agangrikchengaha ine a·kangahani gimin aro Rahman-ba NPP-on ong·ani gimin Chief Minister aro ia dilgiparangni gisepo nangrimani dongama ine Tura MDC aro BJP-ni state vice president sing·doataha.
“Rim·a man·gipa A·chik dilgiparangde, Tribal-rangna on·gimin bilrangkosa warachakengachim. Mominin aro Rahman-ni kosako police-rang, dos donga ine potjaenga ong·ode rim·e donako man·enggipa A·chik dilgiparangnaba apsan cholkon on·na nanga. Police-rang saniba aganaiani gimin ba politics-ni gita pressure ka·anirangna bame on·na nangja,” ine Marak parakatenba, A·chik dilgiparangkoba jamin on·e watpilchina dabiangaha.
NPP-chi dilenggipa GHADC-ni Executive Committee-o bakrimanggipa mitam MDC-rangni bidingo Home Department-chi sandirokatchina gitaba Tura MDC dabiangaha.
