SHILLONG: A·dok sorkarini Megha Health Insurance Scheme (MHIS)-ko Ayushman Bharat scheme baksa chaprimate, ia scheme-ni man·gniko baridapatahaoba ia scheme-na biming segatani komikuenga ine a·dokni Health Minister Wailadmiki Shylla, suk ong·gijaniko parakataha.
Iani bidingo kobor ra·timgipa manderang baksa agangrikengon, MHIS-ni ning·o hospital-rango sanna bananirangko ra·na gita bilsiprakon gong lak 5-ona kingking bariatahaoba, a·doko ia scheme-ko ra·na gita bang·bata manderangan, an·tangtangni bimingrangko segatna gisik nangtokjaenga ine Shylla, suk ong·gijaniko parakataha.
Manderangna u·iatanirangko on·anian rakbatsranggipa kamrangoni mingsa ong·enga ine janapatengon, an·seng baljokaniko on·anio manderang, sorkari baksa bakrimna nangenga ine Shylla aganaha.
An·tangni bi·samiting salrangko gisik ra·atpilengon, skangode sanna bananirangko ra·anio manderangni bang·gija on·gilpaanichiba bang·en dakchakanirangko man·achim indiba da·ororode manderang, sanna bananirangko ra·na gita sorkari, lakni lak tangkarangko dakchake on·engoba, an·tangtangni bimingrangko segatna gisik nangtokjaenga ine Shylla aganaha.
Health awareness program-rangko ong·atengon, badiaba dolrangnasan ong·aigija, manderang jinmanasa ong·atna nangenga ineba Health Minister aganaha.
Adita salrangna skang uni, International Nurses Day-ko manianio bak ra·ani bidingo janapatengon, ia manianio nurse-rangkosan bak ra·ako nike ua suk ong·jaha maina ia manianiara an·tangtangni gisepo tom·aniko ong·atani gitasan ong·aiaha ine Shylla aganaha.
Iandakgipa program-rangkon, manderangna u·iatna gita dal·bate ong·atchinaba ua district official-rangko aro dingtang dingtang dolrangko didiataha.
An·seng baljokaniko on·anide sorkari ba kam ka·giparangni daitosan ong·ja indiba pilakni bakrimna nanggipa kaman ong·a ineba Health Minister aganaha.
