DAMAS: North Garo Hills a·jao kal·susaanirango gisik nanggipa chadamberangna nambata cholrangko on·na miksonganio, Damas songo Mini Stadium-ko rikna gita Sombar salo, a·dokni Chief Minister Conrad K Sangma, pangchakaniko songe on·angaha.
Ia program-ko Sports & Youth Affairs department, Damas-ni Sacred Heart Secondary School-o ong·atangaha aro ia program-o, a·dokni Cabinet Minister Timothy D Shira, Meghalaya Tourism Development Corporation-ni Chairman Marthon D Sangma, Kharkutta-ni MLA Rupert Momin, Sports & Youth Affairs Department, Agriculture Department, District Administration-ni official-rang, chatro chatrirang aro jolo songdongenggipa manderangba bak ra·angtokaha.
Ia tom·bimonganio a·dokni Chief Minister, jinmana aganprakangengon, Damas songo mini stadium-ko rikna gita Sports & Youth Affairs Department-ni ning·o gong kror 3.44 tangkarangko chamatahani gimin ian Damas-o donggipa chadamberanngni dabianiko chu·sokatani gita ong·aha ine parakataha.
Ia kal·chakramo mini stadium dake tarianio, manderangna asongchakani gallery-rangko aro gipin cholrangko done taridapgen ineba Chief Minister parakataha.
Ia mini stadium-ko rikanichi, Damas aro samba jolrango donggipa chadamberangni kal·susaanirangko nambatatna aro dingtang dingtang gadangrango kal·susae chu·sokgiparang ong·a cholrangko on·gen ineba ua aganaha.
2032 bilsini Olympics-o India a·songna kal·susagiparangko ong·katatna gita 2028 bilsini gisepon dam 510 kal·chakram biaprangko rike on·na gita sorkari kang·kare kae kam ka·enga ineba Chief Minister aganaha.
Garo Hills gimiko namroro silroroaniko ra·bana sorkarini chame on·gipa tangka paisarangni gimin janapatengon, gimik ming 53 project-rangna sorkari, gong kror 400-na baten tangka paisarangko chamataha aro North Garo Hills a·jaoba 2018 bilsionin gong kror 33.81 ong·gipa mingsku project-ni ning·o, stadium-rangko, basketball court-rangko aro indoor sports-na dingtang dingtang cholrangko on·na kam ka·engaha ine Chief Minister parakataha.
Resubelpara Stadium-na gong kror 5 tangkarangko chamdapate, ia project-ni korosko gong kror 8.50-ona ra·doatgen ineba Chief Minister ku·rachakaniko on·angaha.
Re·baenggipa 2027 bilsini National Games-ko a·doko sokachakna siengani gimin ia kal·susaaniona an·tangtangko name tarisamsochina gitaba ua, North Garo Hills a·jani kal·susagiparangko didiangaha.
Ia program-ko ong·atanio, dongpae aganprakanggipa gipin manderangara a·dokni Cabinet Minister aro Resubelpara MLA Timothy D Shira, North Garo Hills a·jani Deputy Commissioner Abhishek Saini aro gipinrang ong·a.
