Tura-ni Cherangre-o 41 NCC Battalion-ni gital office-ko CM nokdonggae on·a

TURA: 41 NCC Battalion-ni gital office-ko Mongolbar salo, a·dokni Chief Minister Conrad K Sangma, Tura-ni Cherangre-o nokdonggae on·angaha aro ia gital office-ko nokdonggaanio, NCC Directorate North Eastern Region-ni DDG Brig KJ Singh, NCC Group Headquarters Shillong-ni SM, DGC Col Amil Aul, 41 NCC Battalion-ni Commanding Officer Col DT Antony, West Garo Hills a·jani Deputy Commissioner Vibhor Aggarwal, gipin NCC official-rang, NCC cadet-rang, associate NCC officer-rang aro dingtang dingtang official-rangba bak ra·angtokaha.
Ia 41 NCC Battalion-ni gital office nokko nokdonggae on·anganio a·dokni Chief Minister, jinmana aganprakangengon, ia gital office-ko nokdonggaaniara gisik ra·beani sal ong·gen ine aganenba, ia NCC office-ko kulianiara, Meghalaya a·dokni chadamberangko, namgipa bewalo, dilanio aro mingsing minggamatanio cholrangko on·na sorkarini niksamsoani baksa apsan ong·a ine parakataha.
Meghalaya a·doko songdongenggiparangoni 75 percent-de bilsi 35-na komigipa aro 50 percent-de bilsi 20-na komigiparang ong·a ine janapatengon, chadamberangan a·dokni dal·batsranggipa bil gita ong·ani gimin sorkari, chadamberangni namgnina dingtang dingtang program-rangko ra·gate on·enga ine Chief Minister aganaha.
NCC gita dakgipa institute-rangan chadamberangko a·songna dangdike on·na, bimchipe kamrangko ka·na, mande ra·na aro namgipa bewalrangko ja·rikna didigipa ong·a aro dilgiparang ong·atna dakchakgipaba ong·a ineba ua aganaha.
A·dokni Youth & Sports Policy-ni gimin janapatengon, chadamberangna, mongsongbate diltugipa biaprango donggiparangna cholrangko on·na gita sorkari, lekka pora, kal·susaani, bading chiwalani, jatni daka rikani aro chadamberangni program-rangko apsan ong·atna krenge kamko ka·enga ine Chief Minister parakataha.
2004 bilsio an·tangni skanggipa election-o amako man·ani gimin toe janapatengon, chu·sokgijanirangko man·genchimoba an·tangtangko namdapatna gita pangnan chakchipe aro bimchipe kamko ka·china Sangma, NCC cadet-rangko ku·pattiangaha.
Meghalaya a·dokba India a·songo ta·rakbatsrange dal·roroenggipa a·dok ong·a aro sorkari pangnan, namroro silroroaniko ra·bana, chadamberangna cholrangko on·na aro economy-ko dal·roroatna kamko ka·enga ineba Sangma aganaha.
41 Meghalaya Battalion NCC-ko 1961 bilsini June 3 tariko, 15 Assam Artillery Battery NCC-ko songanichi a·bachengaha aro ia unit-ko 2020 bilsini October jao, 41 Meghalaya Battalion NCC-ona ra·doataha. Ia battalion-an da·o dipet Garo Hills-ni dambonga a·jarango, NCC-ni training-rangko on·enga.
Border Area Expansion Plan-ni ning·o ia unit, college dam 3 aro skul dam 6-oni college dam 7 aro skul dam 18-ona bariatna man·aha.
Ia 41 NCC Battalion-ko ia 2026 bilsini March 3 tariko, Shillong-oniko Tura-ona apjitbaaha.