SHILLONG: PHE department-ni krorni kror ong·gipa project-rangkosan ong·aigija BAC Infratech company, a·dokni dingtang dingtang biaprango, gipin dal·dalgipa kamrangkoba man·aha.
Mawkhanu-o football stadium-ko rikna gita engineering, procurement aro construction (EFC)-o pangchake Hyderabad-ni KPC Projects company, lowest bidder (L1) ine mingako man·aha aro New Shillong-o ia Mawkhanu Football Stadium Complex-ko rikna, re·anggipa bilsion pangchakaniko songahachim. Ia stadium-ko ge 40,000 seat-rang donge rikna gita gong kror 732-ko hisapahani gimin ian India a·songo dal·batsranggipa football stadium-naba miksongani dongachim.
Indake ong·engon, ia dal·begipa project-ko KPC Project company, BAC Infratech company-na sub-contract on·aha ine ma·sina man·aha aro ia project-o nangchakegipa pilak program-rangon BAC-ni official-rangkoba nikna man·aha.
Apsan daken, Tura-o rikna sienggipa Additional Secretariat project-oba BAC Infratech company bak dongpaenga ine kobor man·aha. Ia project-koba KPC Project company-nan on·ahachim aro ia project-koba KPC Project, BAC Infratech company-na sub-contract on·skaaha ine kobor on·aha. Ia project-na a·bachengo gong kror 30-ko hisape donahachim indiba ja·mano sorkari, ia project-ko dal·batatna miksonge, gong kror 150-ko hisapskaaha.
Iana skangsan, PHE department-ni krorni kror ong·gipa project-rangko sorkari, mikkang niteenba, BAC Infratech company-na on·aha ine dingtang dingtang dolrang aro manderang matnangtokahachim.
Da·o a·dok sorkari, gipin department-rangoba, dal·dalgipa project-rangko, BAC Infratech company-na on·skaaha.
Kobor on·timgiparangni aganani gitade, ia company-ni dal·dalgipa manderang, MDA sorkarini dilgiparang baksa nangrimani dongani gimin sorkari, ia company-na a·dokni dal·dalgipa project-rangko on·enga.
PHE-osan ong·aigija gipin dal·dalgipa kamrangkoba BAC Infratech man·a
Date:
Share post:
