Jengjal Megapgre-o POCSO Act-ni gimin awareness program-ko ong·ata

TURA: Budbar salo, West Garo Hills a·jani District Legal Services Authority (DLSA), NALSA (Jagriti) Scheme 2025-ni ning·o ‘Surakshit Bachpan, Surakshit Bhavishya’ ine pangchakaniko donenba, Protection of Children from Sexual Offences (POCSO) Act-ni bidingo awareness program-ko Jengjal-ni Megapgre Government LP skulo ong·atangaha.
POCSO Act 2012-ni bidingo manderangna talatanirangko on·na aro chatro chatrirangna, bi·sarangna chel·chakani, ainni gita on·gimin bilrang aro naljokanirangko on·ani bidingo u·iatna ia program-ko ong·ataha.
Ia program-ko ong·atanio, West Garo Hills DLSA-ni Secretary IR Marak, jinmana aganprakengon, POCSO Act 2012-ni gamchatgipa ong·ani bidingo janapangenba, bi·sarangkode Indian Penal Code (IPC)-o janapjahani gimin bi·sarangna nangani kri POCSO Act-ni ning·o niamrangko ra·gatskaaha ine parakataha.
A·chikrangni niamo basakobarangde, jikgipa siani ja·man me·asana bilsi sokkugijagipa me·chikrangko bia ka·e on·skarongani gimin janapangengon, ian kacharini niamode kragijani ong·a aro POCSO Act-ni ning·o rakgipa sastirangko man·ani ong·a ine DLSA-ni Secretary talate on·angaha.
Ia program-ko ong·atanio, Tura-ni Assistant Legal Aid Defense Counsel Grangchira Ch Marak, NALSA-ni Justice Awareness for Grassroots Information and Transparency Initiative (JAGRITI) Scheme 2025-ni bidingo agan-talatanirangko on·angskaaha.
Ia program-ko ong·atanio, Police Officer Jakre M Sangma-ba jinmana aganprakengon, POCSO Act 2012-ni ning·o on·gimin dingtang dingtang niamrangni gimin talatanirangko on·angenba, bi·sarangna, mongsongbate chatro chatrirangna ia niamrangni gimin agan-talate on·china skigiparangko aro songni nokni ma·a paarangkoba didiangaha.
Ia program-ko ong·atanio, District Child Protection Unit-ni official Tanu R Marak, bi·sarangko naljoke rakkiani aro bi·sarangna on·gimin bilrangni bidingo agan-talatanirangko on·angskaaha.
Ia awareness program-ko ong·atani bak gita DLSA-o kam ka·enggiparag, POCSO Act-ni bidingo manderangna u·iatna gita dakmesokanirangkoba mesokangaha.
Ia program-ko ong·atanio dongpae, jinmana aganprakanggipa gipin manderangara, Tura-ni Assistant Legal Aid Defense Counsel Jericho R Marak, Jengjal Megapgre Govt LP skulni Principal Kaningthon Ch Marak aro gipinrang ong·a.