Assam Police, Raksamgre-ona re·bae dokkanrangko chipna ka·mikkenata

TURA: Ru·uta bilsirangonin Assam aro Meghalaya a·dokni simarango so·sojengjeng ong·anirangko nikna man·engon, adita salrangna skang Assam-ni police officer-rang, Meghalaya a·dok ning·o donggipa Raksamgre Civil Sub-Division ning·o donggipa songrangona re·bae, songni dokkanrangko chipna ka·mikkenatanirangko on·angaha ine Pedaldoba-o donggipa dingtang dingtang dolrang, chong·motan GSMC Pedaldoba regional unit, FKJGP Pedaldoba circle, FAF Pedaldoba regional unit aro CRF Pedaldoba regional unit, West Garo Hills a·jani Deputy Commissioner-na badi ka·doangaha.
Pedaldoba NGO-rangni Deputy Commissioner-na badi ka·e sedoatani gitade, May-ni 19 tariko, Assam a·dokni Goalpara-o donggipa Rongsai outpost-oni police-rang, Meghalaya a·dokni official-rangna maming u·iatchengani gri, Raksamgre Civil Sub-Division-ni ning·o donggipa Rongsai songona re·baenba, songni dokkanrangko chipna ka·mikkenatanirangko on·angaha.
“Assam-ni police official-rang, a·dok damgnini simarangko ma·sigenchimoba, iandake Meghalaya-ona re·bae songni manderangko ka·mikkenataniara a·dok damgnini gisepo so·sojengjeng ong·aniko ra·bana jotton ka·ani gitasa ong·aha,” ine Pedaldoba-ni NGO-rang parakataha.
Deputy Commissioner-na sedoatgipa chittio NGO-rangni parakatani gitade, Meghalaya a·dokba Assam-ni bak ong·engmiting somoirango, ia jolni simarangko name bak ka·jani a·selan Meghalaya a·dokko 1972 bilsio man·chengaonin ia sima jolrango a·dok damgnini manderang, meligrikna man·jaenga.
Ia jolrango a·dok damgnini manderang meligrikna man·jaengani a·selan namroro silroroanirang dongjaenga aro so·sojengjeng ong·anirangko nikna man·rongenga ine janapatengon, “Brahmaputra chibimani Jinjiram chiringara, Meghalaya a·dokni Garo Hills-na sima ari gita ong·achim indiba da·o ia chiring, salgipengchipakna jitangahani a·sel, Assam a·dokni manderang, Meghalaya a·dok ning·o gama ge·anirangko dake aro songdong a·chae, napdrabana man·aha,” ine Pedaldob-ni NGO-rang parakataha.
NGO-rangni parakatani gitade, songni budepa butchumarang aro songni dilgiparango sing·sandie ra·on, Assam aro Meghalaya a·dokni simarangara, Rongsai Bazar dolong, Sapang Pahar, Mangnakopa, Sildubi aro Jolsimina jolrangan asol simarang ong·achim ine ma·sina man·aha.
“Samson Geography-oba, ia songrangko Meghalaya a·dokni sima ning·o donggipa songrang ong·a ine sea donga aro Jinjiram chiringkoba Meghalaya a·dok ning·o jokgipa inen janapani dongachim. Indiba somoirang re·angani kri ia chiringni rama dingtangroroange, Assam a·dokni manderang, Meghalaya a·dok ning·o napdrabae songdongna aro bagan barirangko dake cha·na man·aha,” ine Pedaldoba-ni NGO-rang parakataha.
Indake ong·engon, ia jolrango songdongenggipa manderangni namgnina a·dok damgnini gisepo agan-chanchirimanirangko dake, ia simarango donggipa biaprango pangkamgipa cholrangko ra·gatchina NGO-rang, West Garo Hills a·jani Deputy Commissioner-ko didiataha.