W’nagar-o Agri, Horti aro Food Processing-ni gital college-ko kuligen: CM
TURA: Bristibar salo, Meghalaya sorkarini Labour, Employment & Skill Development Department, CM Skills Mission aro Meghalaya State Skill Development Society (MSSDS) baksa nangrime, Skillerate 2026 program-ko Tura-ni BAKDIL Training Centre sambao donggipa Holly Hocks-o ong·atangaha aro ia program-ko ong·atanio, a·dokni Chief Minister Conrad K Sangma, Labour, Employment & Skill Development Minister Methodius Dkhar, West Garo Hills a·jani Deputy Commissioner Vibhor Aggarwal, dal·dalgipa official-rang, training-ko on·enggipa dolrang, skie ra·enggiparang aro gipinrangba bak ra·angaha.
Ia tom·anio a·dokni Chief Minister, jinmana aganprakangengon, ia program-ara, manderangni nangani aro neng·nikanirangko sorkarina u·iatna ong·atenggipa CM Connect-ni niksamsoaniko mesokgipa program ong·a maina CM Connect program-ko ong·atanio chadambe saksani nangnikaniko parakaniara chadamberangna jakni kamrangko skie on·na, an·tangtangna janggi tangani cholko tarie ra·na aro janggi tanganio dakchakaniko on·china bi·ani ong·a ine parakataha.
Hajalni hajal chadamberangna namgniko on·gipa dingtang dingtang skill development program-rangna sorkari gong crore 32-na baten tangka paisarangko koros ka·ahaoba training-mangmangko on·aiachide chu·ongjawa ine sorkari ma·siaha ine janapatengon, training-rangko matchotgimin bang·a chadamberangan, kamrangko a·bachengna gita nangchongmotgipa bosturang dongjani a·sel neng·nikanirangko chagrongna nangtokenga ine sorkarina u·iatani gimin training matchotgimin chadamberangna bosturangko aro kamrangko a·bachenganio dakchakaniko on·na tik ka·aha ine Chief Minister parakataha.
Ia program-ara, chadamberangna bosturangko suale on·ani program-mangmangsan ong·ja indiba chadamberangna mikkim, ka·dongani aro janggi tangani cholko on·anisa ong·enga ineba Chief Minister aganaha.
Meghalaya a·dokba da·alo India a·songo ta·rakbatsrange dal·roroenggipa a·dokrangoni damsa ong·enga ine janapatengon, a·dokni dal·roroanio nokdang ge·anti, chadambe sakanti, game ge·e cha·gipa sakanti, kam ka·e cha·enggipa sakanti aro bading chiwalgipa sakantian namgniko man·jaenga ong·ode a·dokni dal·roroanimangmangde chu·onggipa ong·jaenga ine Sangma aganaha.
Chief Minister-ni aganani gitade, batanggimin bilsirango sorkari, chadamberangna training on·ani program-mangmangkosan ra·gate on·rongaiachim indiba da·alo chadamberangna, an·tangtangni kamrangko a·bachengna gitaba sorkari jakkandilaniko on·engaha.
Chadamberangna dingtang dingtang kamrangni gimin skie on·ani program-rangko nambatatna gita sorkari, private training institute-rang baksaba bakrimenga ine janapatengon, private training institute-rang baksa bakrimanichi da·alo chadamberangna, kamrangko nambate skie on·asan ong·aigija kamrangkoba on·jolna cholko man·enga ine Chief Minister parakataha.
Captain Williamson Sangma State University-ni academic course-rangko a·bachengna man·ahani gimin aro Architecture & Urban Planning course-rangko a·bachengna ra·chakako man·ahani gimin an·tangni kusi ong·aniko parakatengon, Williamnagar-o Agriculture, Horticulture, aro Food Processing-ni gital college-ko kulina miksongenga aro ia college-ni academic session-rangko 2027 bilsini gisepon a·bachengna sorkari nisan ka·enga ine Chief Minister parakataha.
A·dokni Veterinary College-ko Ri Bhoi a·jani Kyrdemkulai-o kuliskagen ineba ia tom·anio Chief Minister parakataha.
Labour department-ni ning·o ka·enggipa kamrangko, mongsongbate dingtang dingtang kamrangoniko gile man·gipa kajinarangchi a·bachengatgipa kamrangna mittelpilaniko parakatengon, ia kajinarangonikon da·alo, health insurance, tangka paisani gita dakchakani, lekka porao dakchakani aro kam ka·enggiparangna aro uamangni nokdangrangna dingtang dingtang program-rangna jakkalskaenga ine Chief Minister aganaha.
A·doko lekka porani gadangko namdapatna nangengani giminba ia tom·anio Chief Minister janapangaha.
A·dokni manderangna dangdike on·engon, ka·sachakani aro on·kangani gnang kamko ka·china gitaba Chief Minister, pilak official-rangko aro kam ka·giparangko didiangaha.
Ia tom·anio, a·dokni Labour, Employment & Skill Development Minister Methodius Dkhar-ba jinmana aganprakangengon, industry ba karkanarango nangchakegipa kamrangni bidingo chadamberangna skie on·na nangengani gimin aro dingtang dingtang training program-rangko ong·atanichi kam ka·e cha·ani cholrangko bariatna nangengani gimin aganangaha.
Ia program-ko ong·atanio, Skills Meghalaya and Supporting Human Capital Development in Meghalaya (SHCDM)-ni ning·o sak 4830 chadamberangna training-ko on·na gita gong 16,59,56,334-ni ming 34 work order-rangko on·angjolaha. Dingtang dingtang kamrangko ka·e cha·na training-ko man·gipa sak 798 chadamberangna, uamangni kamrangko a·bachengatna gita ia tom·anio gong 44,72,287-ni bosturangkoba suale on·angaha.
