TURA: SsP-COs Conference-ko May-ni 21 aro 22 tarikrango salgnina, Tura-ni Tree House Resort-o ong·atenga aro a·dokni Chief Minister Conrad K Sangma-ba skanggipa salo dongpae bak ra·angenba, Meghalaya Police-ni officer-rang baksa, police dolrangni kamrangko mangrakbatatna aro namdapatna chanchirimangaha.
Ia conference ba tom·bimonganiko ong·atanio, a·dokni Director General of Police (DGP) Idashisha Nongrang, Inspector General of Police (L&O) DNR Marak, Inspector General of Police (CID) A Goenka, Inspector General of Police (SB/Bdr) DP Marak, Deputy Inspector General of Police (A) JG Momin, Assistant Inspector General of Police (A) SR Marak aro dingtang dingtang police officer-rangba bak ra·angtokaha.
Ia tom·aniko ong·atanio a·dokni Chief Minister, police officer-rang baksa chanchirimengon, SsP-COs Conference-ko ong·atjringenganichi, Meghalaya Police-ni kamrangko bang·en namdapatna man·aha ine ia conference-ko ong·atjringengani gimin a·dokni DGP-ko mittelpilangaha.
Police officer-rangni ia mongsonggipa tom·bimonganiko Tura-o ong·atahani gimin talate on·angengon, ia a·dokni nangchongmotgipa tom·bimonganirangko a·dokni dingtang dingtang biaprango suale ong·atna ja·ku de·ani bak ong·a ine mikkangchiba iandakgipa tom·anirangko skotong songjinmaosan ong·aigija a·dokni dingtang dingtang biaprango ong·atangkuchina Chief Minister didiangaha.
Ia conference-ko ong·atani miksonganiko talate on·angengon, police officer-rang, an·tangtangni nangnikani aro neng·nikanirangko parakna cholko on·anisa ong·a ine Chief Minister aganaha.
Ia tom·anio police officer-rangni janape on·anggipa dingtang dingtang nangani aro neng·nikanirangko janapangengon, uni bilsichetna Chief Minister ong·e kam ka·anio ua changsaba mitam neng·nikanirangkode knaa dongkujachim ine mikkangchiba ia cholko ra·e, an·tangtangni neng·nikanirangko sorkariona ra·bachina Chief Minister, police officer-rangko ku·pattiangaha.
Police officer-rangni mitam neng·nikanirangko ta·rakede namatna man·janaba gnang indiba cholrangko nie, pilak neng·nikanirangko namatna sorkari kam ka·gen ineba Chief Minister, ku·rachakaniko on·angaha.
Iandakgipa tom·bimonganirangko ong·atanichi police dolrangni kamrangko namdapatna man·na nanga ine janapangengon, police-rangni kamde skanggipa, niam retiko rakkina, ong·gija kamrangko champengna aro manderangna naljokaniko on·anian ong·na nanga ine Chief Minister aganaha.
Police officer-rangna, mongsongbate Meghalaya Police-ni ning·o kam ka·enggiparangna dontonggija training-rangko on·na nangani gimin janapatengon, police-rangni kamrangko nambate nie ra·na aro skie ra·na gita Mumbai, Delhi aro uandakgipa gipin biaprangona watatchina Sangma, ku·pattianiko on·angaha.
A·doko tom·tomaniko rakkina aro manderangna naljokaniko on·na rakbee kamrangko ka·engani giminba a·dokni Chief Minister, Meghalaya Police-ni pilak officer-rangko aro sipairangko mittelpilangaha.
