SHILLONG: Re·anggipa somoio, GHADC election-ona susana gita nomination file ka·na on·miting somoio Garo Hills-o so·sojengjeng ong·anio, a·dokni chel·chakgipa dolni intelligence-ni gita kam ka·ani ja·man chakanirang dongaha ine Meghalaya Director General of Police (DGP), Idashisha Nongrang Bristibar salo ku·rachakaha.
Turao ong·atgipa ge·sa state-level police conference-o Bristibar salo aganengon, Garo Hills Autonomous District Council (GHADC) eletion-o suana gita Scheduled Tribe certificate-rangko on·na nanggen aro Tribal-rangsan susana man·aigen ine dabiani ja·manba non-tribal candidate-rangni drae nomination file ka·na am·ani a·selo Garo Hills-o namen so·sojengjeng ong·aha, aro ia a·sel ong·gipani bidingo police, uamangni kam ka·ani aro tarisoanirang maidake ong·enga, uarangko nipilna nangao ga·akaha ine Nongrang aganaha.
GHADC election-o, non-tribal-rang susana man·jawa ine champengtani bijangchio, draenba nomination file ka·na am·ani gimin so·sojengjeng ong·ani Garo Hills bang·a biaprangon nangchakeaha. so·sojengjeng ong·anio, sakgni manderangni janggirang sia bon·aona sokaha, aro gam-jin, mal-mattarangko nosto ka·tokaha, jeni a·selan GHADC election-ko dontongna gita A·dok sorkari draatako man·aha.
Ong·anggimin a·sel-obostarangko nipilate aganengon, a·sel-apotrang ong·na skangan police, koborrangkode man·skangachim, indiba uarangko police namedake chekjaha ineba Nongrang aganaha.
Uni aganani gitade, GHADC Poll-ni bidingo nangchapatgipa mamlarangni bidingo manderangko ku·monganirangni bidingo dingtang dingtang dakgipa koborrangko man·soachim. Indake ong·genchimoba ia koborrangni bidingo, ba golmal ong·banagipani bidingo kam ka·soanio ja·manchakaha.
Indake ong·engon, ia a·sel ong·ani ja·mano ja·pang ja·dilrangko namedake nipilaha aro maio ja·manchakenga uarang pilakko sandiaha, jedakode mikkangchi iandakgipa obostarangko chagrongtaina nangjawa, aro namedake jako ra·na gita man·gen, DGP aganaha.
Garo Hills-o, law enforcement agency-rangna infrastructure-rangni chu·onggijaniko aroba forensic laboratory donggijaniko Nongrang janapangaha, uani a·selba investigate ka·anio ba sandianiko dakanirangko neng·nikanirangko man·enga ineba DGP agandapaha.
