PASF-Abong Noga College-ni gital buildingko rikna pangchakaniko songa

TURA: Chief Minister Conrad K. Sangma, PASF-Abong Noga College-ni gital building-ko rikna pangchakaniko songe on·anga baksa New Tura-o donggipa college-ni mikkango gital rikgipa College Conference Hall-koba nokdonggae on·aha.
Programo  P.A Sangma Foundation-ni President Soradini K. Sangma, Lok Sabha-ni gitcham MP Agatha K. Sangma, PASF – Abong Noga College-ni Adviser Dr. Nagesh Tekale, Navdrushti (NGO)-ni president Santosh Jagdhane, college management-ni memborrang, chatro-chatrirang aro jolni dilgiparang bakko ra·angaha.
College-na gital building-ko rikna Dorf Ketal Chemicals India Ltd, tangka paisako on·e dakchakenga. Skanggipa instalment-ni gita kror 5-ko on·aha. Meja bilsi 2025 November 26 tariko P.A Sangma Foundation aro Dorf Ketal Chemicals India Ltd aro Ira Gurukul Educational Trust melie ia project-o kam ka·rimna Memorandum of Understanding-ko soi ka·aha.
Tom·anio jinmana aganprakataon CM, ia salko mongsonggipa sal ine janapaha aro uni pagipa Purno Agitok Sangma sagini higher secondary school aro college-ko rikna chanchidilani bidingo aganangaha.
“P.A Sangma sagina, Education-ara bilongen gamchatgipa ong·achim ua skia-poraianiko namen dal·e ra·gipa ong·achim. Ua skigipani kamko ka·e uni career-ko a·bachengaha, indake uni janggi tanga gimikan gipin kamrang jekai journalist, lawyer, Member of Parliament, Chief Minister, Lok Sabha-ni Speaker ba National People’s Party-ni President ong·e dangdike on·angao ua education-ni a·bao dangdike on·aniko pangnaba galjaha.”
Institution-ko a·bachengani somoirango adita neng·nikarangko chagrongenchimoba da·ode ian college-na gital building-ko rikna cholko man·pilengjok ine CM aganaha.
Uni gisepon Subodh Menon, Chairman Rudin Menon, Dorf Ketal-ni pilak memborrangko ia Corporate Social Responsibility (CSR)-ni gita dakchakanina mittelangaha.
“Ia company, a·songni je bako donggipa institution-ko basena man·achim indiba uamang PASF Abong Noga Collge-ko dakchakna baseaha. Company, college-na kror 8 tangkako on·enga.
PASF-Abong Noga College, P.A Sangma Foundation-ko dakchakanio bilsi 2022-oni uamangni academic session-ko New Tura-o degree college dake a·bachengaha. Bilsi 2023-o North Eastern Hill University baksa bakrimataha. Bilsi 2022 December 12 tariko Meghalaya sorkarini Grant-in-Aid Scheme-ni gita People’s College ine recognised ka·a man·aha.