TURA: Gitcham Nokma Union-ko Nokma Sani Union ine mingskaenba, gital dake songpiltaiaha.
Ia Nokma Sani Union-ko songani bidingo talate on·atengon, ia Nokma Union-ara gital songako man·gipa union ba dol ong·ja indiba Meghalaya a·dokna krenge kamko ka·engmiting somoirango bikotgipa dolan ong·a ine Nokma Sani Union-ni secretary parakataha.
Nokma Union-ko Nokma Sani Union-ni mingsreani gimin talataniko on·angskaengon, ‘Sani’ ba me·asa Nokmarangara, songko nokko dilanio aro jatni kamrango ka·anio mongsonggiparang ong·ani gimin ia Nokma Union-ko da·o Nokma Sani Union mingskaaha ine union-ni secretary parakataha.
Ia Nokma Sani Union-ko, Nokma Council-o bak ra·gijagipa Nokma-Sanirang nangrime bikotaha ineba secretary u·iataha.
Tribal-rangni kamrango aro songko nokko chalaianio Garo Hills Autonomous District Council (GHADC)-an bilko man·gipa ong·ani gimin Mongolbar salo, Nokma Sani Union-ni membor-rang, GHADC-ni Chief Executive Membor (CEM) Dhormonath Ch Sangma-ko grongenba, Nokmarangni chagrongna nangenggipa dingtang dingtang neng·nikanirangko janape on·angjolaha.
“Nokma Council-de GHADC-ni bilo ong·gija kamrangko jakgitele ka·a indiba chinga Nokma Sani Union-de GHADC baksa nangrimesa kamrangko ka·na ku·rachakenga. Nokma Council-sa Panchayati Advancement Index (PAI)-naba NOC-ko on·aha aro kachario case-rangkoba ama man·aha. Indiba iarangni bidingo Nokma Council, dingtang dingtang Nokmrangna u·iatjaha aro iani bidingo Nokmarang, Nokma Council-ko kachariona salangna man·aia. Uni gimin Nokmarangna mikrakatanirangko on·na gita chinga Nokma Sani Union, Garo Hills-ni dambonga a·jarango donggipa pilak lascar area-rangon tom·anirangkoba ong·atna tik ka·aha,” ine Nokma Sani Union-ni secretary parakataha.
