Shillong LS by-poll-na saksku manderang, BJP-ni tikitna nidingenga

SHILLONG: Shillong Lok Sabha by-election-ko ong·atanio Bharatiya Janata Party (BJP)-ba susana tik ka·manahani gimin saksku manderang, party-ni tikitna nidingenga aro iani bidingo a·dokni BJP, bakan ma·mongni dilgiparangna recommendation-ko watatna siengaha.
Iani bidingo kobor ra·timgipa manderang baksa agangrikengon, adita salrangna skangsan BJP-ni dilgiparang tom·e chanchirimangtaienba, Shillong Lok Sabha by-election-o susana tik ka·angaha ine Meghalaya BJP-na ku·wattimgipa Mariahom Kharkrang parakataha.
“Chinga party-ni ja·delbatgipa dilgiparang tom·aniko ong·atangaha aro ia election-o susana nangtelgen ine tik ka·aha. Ia election-o susana on·china chinga bakan ma·mongni dilgiparangna recommendation-ko watatgen aro chinga ka·donga, uamang chingni nangnikako ra·chakgen,” ine Kharkrang aganaha.
Shillong Parliamentary by-election-na Cabinet Minister Sanbor Shullai-ko candidate dake susana miksongenga ine knasamsona man·enggipani bidingo sing·on, ua susana nangnika ong·ode una party tikitko on·ani cholrang dongbatenga ine Kharkrang aganaha.
“Shullai, an·tangni constituency-o aro gipin biaprangoba an·tangni dakna man·ako mesokaha, uni gimin ua susana kusi ong·aia ong·ode chinga uko candidate dake susaatna namen kusi ong·begen. Indiba chinga uko dranade man·jawa,” ine BJP-na ku·wattimgipa aganaha.
Shillong Lok Sabha by-election-o susana gita BJP-ni tikitna dorgasto galgipa candidate-rangni gimin sing·on, “Re·anggipa chang chingni tom·aniko ong·ataniode, party tikitna dorgasto galgiparang saksku gapaha,” ine Kharkrang parakataha.
Shillong Lok Sabha by-election-na Meghalaya Democratic Alliance (MDA)-ni gisepo bakrime susana chanchirimanirang dongjani gimin apsan candidate-ko susaatani cholrang dongjawa ineba ua aganaha.
“Shillong by-election-o MDA-ni gita apsan candidate-ko susaatna chanchisoanirang dongani gimin MDA-o bakrimenggipa pilak party-rangan, an·tangtangni candidate-ko susaataigenkon,” ine Kharkrang aganaha.
June-ni 18 tariko ong·atna sienggipa Rajya Sabha election-ni bidingo janapatskaengon, da·o dipet iani bidingo BJP, chanchia dongkuja ine Kharkrang parakataha. Sak 60 membor-rang donggipa Assembly-o MDA-ni membor-rang bewalan dongani gimin MDA-ni candidate-nan BJP-ba chakpaaniko on·ani cholrang donga ine ua aganaha.
“Chingo MLA sakgnisan dongaiani gimin Rajya Sabha election-de dingtang ong·naba gnang. Chinga MDA-ni candidate-nan chakpaaniko on·ainaba gnang,” ine BJP-na ku·wattimgipa aganaha.