TURA: An·tangtangni chu·sokgijanirangkon ra·chakna sikjaenga ong·ode maming dakeba a·doko lekka porani kamrangko namdapatna man·jawa ine Bristibar salo, Opposition dolni dilgipa aro a·dokni gitcham Chief Minister Mukul Sangma, Union Education Ministry-ni Performance Grading Index (PGI) 2.0-o Meghalaya a·dokni bon·kamgipa biapko man·taiahani gimin suk ong·gijaniko parakataha.
“Batanggimin bilsirangonin iani bidingo Assembly-oba apsan chanchirimaha aro chinga changni chang a·dok sorkarina namdapatna nanganirangko aganjachimma? Indiba chingni agananirangna nachil songjaenga ong·ode iandakgipa obostakon an·ching nikna man·aigen. Saksa a·dokni dilgipa ong·e kamo chu·sokgijaniko ra·chakchengna nanggen indiba chu·sokgijanirangkon jegalsime dongaia ong·ode maming dakeba kamrangko namdapatna man·jawa,” ine Sangma aganaha.
Chu·sokgijanirang donga inen ra·chakna sikjaenga ong·ode aro an·tangtangni chu·sokgijanirangko jegalnasa skaia ong·ode maikai namdapatani cholrangko sandina man·gen ineba ua aganaha.
Lekka porani chu·sokgijanio ma·mong sorkari aro a·dok sorkari dolgnian dai donggiparang ong·a ineba Opposition dolni dilgipa matnangataha.
Meghalaya a·doko lekka porako namdapatna gitade, dingtang dingtang neng·nikanirangko name ma·sie ra·chengna nanggen ine janapatengon, lekka poraosan ong·ja indiba an·seng baljokani aro pilak kamrangon sorkariko chalaienggipa manderang, skie ra·na skani, neng·nikanirangko tale ma·sie ra·na skanirang dongchengna nanggen, unosa kolgapgijanirangko kolgapatna gita cholrangko sandinaba man·gen ine Sangma parakataha.
Chu·sokgijanirangko ra·chakna sikjaode lekka porako namdapatna man·jawa: Mukul
Date:
Share post:
