NPP, BJP-o napna miksongenga ingipani bidingo Mukul mamingkoba aganja

TURA: National People’s Party (NPP) aro Bharatiya Janata Party (BJP)-o napna miksonganirang donga ine jangbingbanganirang ong·katani ja·man, Opposition dolni dilgipa Mukul Sangma, iani bidingo mamingkoba aganjaha indiba ian kobor setimgiparangni kamrangsan ong·aia ine parakatskaaha.
NPP aro BJP-o napna miksonganirang donga ine jangbingbangenggipa kattarangara kakket ong·ama ine sing·anina aganchakaniko on·angengon, “Iade na·simangni segipa koborsa angni ong·ja, na·simang iani bidingo saniba parakataniko knaa dongjokma?” ine Sangma sing·dopangpilaha.
“Ia koborkode poraina namnikgiparangnasan seaiaha inesan angade aganaia,” ineba ua aganaha.
West Bengal a·doko Trinamool Congress (TMC) ra·ongalako man·ahani gimin mikkangchi maikoba dakna miksonganirang dongskaengama ine sing·on, “Pilak party-rangan somoini kri bilakgipaba ong·aia aro ga·aknaba man·aia. 2021 bilsini West Bengal election-o BJP-na mai ong·skaa na·simang gisik ra·engama? Ua somoio BJP dam 77 seat-rangkosan cheaiachim indiba da·alo dam 200 batpile cheskaaha. Uni gimin iade pilak party-rangnan ong·aia aro pilak party-rangan tang·doani aro tang·onanikode chagrongna nangaia,” ine Meghalaya a·doko TMC parliamentary party-ko dilenggipa Sangma aganaha.
TMC-ni bidingo mittele aganangengon, ia party-kode ja·pang ja·dilni bilo pangchakesa rika indiba ia bilkon ma·sijaenga ong·ode je somoioba party be·gruna man·aia ine Sangma parakataha.
NPP-o napna miksonganirang donga ine jangbingbanganirangko da·o dipet NPP aro Mukul Sangma an·tangba name paraka dongkujaengachim indiba iandake jangbingbanganiko adita salrangna skangsan NPP aro TMC-ni dilgiparangde jegalatskaahachim.
Mukul Sangma-ko BJP-o napna miksonganirang donga ine jangbingbangenggipani bidingo BJP-ni saksa dilgipao sing·skaon, iako ua jegalaba jegaljaha aro ua napna sienga ineba aganskajaha. Anti-defection Law-ko pa·sike da·o dipet BJP-o napna sienggipa dilgiparangni bimingrangko mingna man·kujawa inesa BJP-ni dilgipa aganaha.
Khasi aro Jaintia Hills a·jarangonisan ong·aigija, Garo Hills-oniba bang·a dilgiparangan BJP-o napna gita uko gronge agangrikaha ineba BJP-ni dilgipa parakataha.