SGH-ni Balwat Rongchanggre skul nok namjae neng·nikanirangko man·enga

CHOKPOT: Meghalaya a·doko lekka porako on·ani aro skul nokrang namjani a·selan Union Education Ministry-ni Performance Grading Index (PGI) 2.0-o a·dokko bon·kamgipa biapo donattaia aro iani gisepon da·o changsataie, South Garo Hills a·jani Chokpot jolo donggipa Balwat Rongchanggre Government LP skul nok namjani a·sel poraienggipa bi·sarang aro skie on·enggipa manderangni neng·nikanirangko knasona man·taiaha.
Ia Balwat Rongchanggre songara, Chokpot-oni adita kilometre-rang re·na nanggipa song ong·a aro ia songni LP skul nokko ru·uta bilsirangonin tarigija galchipe donengani a·sel, poraienggipa bi·sarang aro skie on·enggipa manderangba neng·nikanirangko chagrongna nangtokenga ine kobor on·timgiparang parakataha.
Kobor on·timgiparangni u·iatani gitade, ia skulo kelki aro do·garangba dongja aro skul nokni mitam nokking aro pakmarangba dongjani a·sel ia skul noko matchurangba ma·chaktokenga.
Skulko chalaienggipa headmaster-ni parakatani gitade, ia skulko 1935 bilsio kuliaha aro da·o dipet ia skulo skigipa sakbri, sak 52 bi·sarangna skie on·enga. Ia skulko kulichengani somoiode skul nokko am·pangchisa rikaiachim indiba ja·mano Assam type nok te·gniko rike, 1994 bilsiode kuturi ge·gittamko man·aha. Iani ja·man 2000 bilsirango, RCC kuturi ge·sakoba ia skulna rikdape on·aha ine skulni headmaster parakataha.
Da·o ia skulo nok te·gittam donga indiba Assam type nok te·gnide obosta namsrangjae, bi·sarangna skie on·anio neng·nikanirangko chagrongna nangenga ine headmaster aganaha.
“Ia skul nokni obosta, ru·uta bilsirangonin namjana a·bachengaha aro chinga ia skul nokni bidingo baditaba chang district education officer-naba u·iatahachim. Chinga seachiba sorkari official-rangna u·iataha aro unbaksana skul nokni obostako photo, video ka·eba on·ahachim indiba da·alonan maming dakchakanirangko man·kujaenga,” ine skulni headmaster Greatherson R Sangma parakataha.
Skul nokrang namsrangjani a·selan sakbri skigiparang, class ge·snina, apsan classroom-on skie on·na nangenga ineba headmaster parakataha.
Indake ong·engon, ia skulona GSU Chokpot unit, FKJGP, AYWO aro dingtang dingtang dolni dilgiparang, re·ange nienba, ia skul nokni obostako nike suk ong·gijaniko parakattokaha.