SHILLONG: Meghalaya a·doko songdongenggipa nokdangrangoni bang·batan da·o, bijoli, ringani chi, a·pal re·ani, bank-ni kamrang aro uandakgipa cholrangko man·engaha ine 2023-2024 bilsini National Family Health Survey (NFHS-6)-o parakaha.
NFHS-6-o see rakkigipa data-ko parakani gitade, a·doko songdongenggipa nokdangrangoni da·o 95.9 percent-de bijoli donggipa nokdangrangsa ong·aha. 2019-2021 bilsini NFHS-5-ode a·doko bijoliko jakkalgipa nokdangrang, 91.9 percent-mangsan ong·kuengachim.
Meghalaya a·dokni songadam nokadamrango bijoliko jakkalgipa nokdangrang, 95.1 percent ong·aha ineba NFHS-6 data-o parakaha.
NFHS-ni survey ka·anio man·ani gitade, a·doko ringani chirangko man·gipa nokdangrangba da·o 84.3 percent-ona tang·doangaha maina iana skang survey ka·aniode, ringani chiko man·gipa nokdangrang 79.2 percent-san ong·kuengachim.
NFHS-6 urban coverage-ba 93.7 percent ong·aha aro rural coverage-ara 82.2 percent ong·skaaha.
Sanitation ba a·pal re·chakanirangko jakkalanioba a·doko songdongenggipa nokdangrang tang·dobatengaha maina NFHS-6-o mesokani gitade, a·pal re·chakaniko jakkalgipa nokdangrang da·o 94.6 percent gapengaha.
Bank-ni kamrango channako man·aniba a·doko tang·doangaha maina nokdango bank account donggipa nokdangrang da·o 93.5 percent gapaha.
Iodine donggipa kariko cha·anioba NFHS-6 data-ni gita a·doko namen tang·doangaha aro ian a·doko songdongenggipa manderangni namgipa cha·ani ringanirangko cha·na ringna nangani gimin ma·sibataniko mesokani ong·aha.
Health insurance donggipa nokdangrangko niatgenchimode, NFHS-5-o a·doko health insurance donggipa nokdangrang 69 percent-san ong·kuengachim indiba da·o NFHS-6-ode 74.9 percent nokdangrang gapaha.
Internet jakkalgiparang, mongsongbate me·chikrang 34.7 percent-oni da·o rang·san 59 percent-ona tang·doangaha aro me·asarangni internet jakkalaniara, 36.5 percent-oni 68.7 percent-ona tang·doangskaaha.
A·doko bang·batan bijoli, ringani chirangko man·engaha ine NFHS-o paraka
Date:
Share post:
