SHILLONG: Adita sal somoirangni gisepo ong·atna sienggipa Shillong Lok Sabha by-election-o United Democratic Party (UDP)-ba candidate-ko susaatna tik ka·ahani gimin ia election-o UDP-ni dilgiparang, Regional Democratic Alliance (RDA)-o bakrimpaenggipa Hill State People’s Democratic Party (HSPDP)-ni bakrimaniko man·na ka·dongtokenga.
UDP-ni president Metbah Lyngdoh-ni parakatani gitade, Shillong Lok Sabha by-election-o UDP aro HSPDP dolgni, bakrime kamrangko ka·genma ka·jawa, da·o dipet name ma·sikujaenga indiba ia dolgnian da·oba RDA-o bakrime dongkuenga.
“RDA-ko niatgenchimode, chinga a·bachengonin bakrimkuenga aro da·oba apsanan dongkuenga,” ine Lyngdoh aganaha.
Shillong Lok Sabha by-election-o HSPDP, an·tangtangni candidate-ko susaatgenma, ma UDP-ni candidate ukil Vivan GK Kynta-na chakpaaniko on·genma, da·o dipet UDP-ni dilgiparangna u·iata dongkujaenga ineba Lyngdoh parakataha.
HSPDP, jeko dakna tik ka·a, uko uamang ra·chakaigen ineba UDP president aganaha.
HSPDP-ni chakpaaniko UDP nangnikenga ine janapatskaengon, HSPDP aro UDP dolgnini bang·bata miksonganirangan apsan ong·ani gimin dolgni bakrime kamrangko ka·anichi chu·sokna man·gen ine Lyngdoh, an·tangni ka·dongchakenganiko parakataha.
“Chinga uamangna (HSPDP) do·gako oe donengkua aro chingni kamrango uamangni bakrimaniko nangnikenga,” ine ua aganaha.
Shillong Lok Sabha by-election-o susana gita adita salrangna skangsan UDP, saksa ja·delbatgipa ukilrangoni saksa Kynta-ko party candidate dake parakatahachim.
Shillong Lok Sabha by-election-o susana gita da·o UDP-ba candidate-ko parakatahani gimin ia election-o susana sienggipa candidate-rang sakbri gapengaha.
Shillong Parliamentary by-election-o susana gita Congress dolde gitcham MP Vincent Pala-ko, NPP-ba Khasi Authors Society (KAS)-ni president Dr DRL Nonglait-ko aro VPP-ba party-ni dilgipa Batskhem Myrboh-ko susaatna tik ka·manahachim.
BJP-ba ia by-election-o susana miksongenga indiba da·o dipet candidate-ko parakskakujaenga.
Re·anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man·e siangani ja·man da·o Shillong Parliamentary Constituency-ni by-election-ko ong·atna nangengachim ine nikna man·a.
