AMPATI: Sombar salo, South West Garo Hills a·jani District Tobacco Control Program (NTCP), National Oral Health Program (NOHP) baksa nangrime, skulo poraienggipa bi·sarangna ta·makku jakkalani namgijanirangko u·iatna aro ta·makku jakkalaoniko chel·chakna gita World No Tobacco Day 2026-ko Dengasi-o donggipa Bidamong Educational Foundation School-o maniangaha.
Ia program-ko Ampati Civil Hospital-ni Dental Surgeon Dr Challang R Sangma dilangaha aro tom·anio, health official-rang, songni nokni dilgiparang, skigiparang, chatro chatrirang aro jolo songdongenggipa manderangba bak ra·angtokaha.
Ia program-ko ong·atanio, South West Garo Hills a·jani SDSEO Emphul Ch Marak, mongsonggipa sokgipa ong·e, tom·anio bak ra·giparangna aganprakangengon, ta·makku aro pekatgipa bosturangoni chel·e dongchina aro an·tangtangni lekka porao gisik nanggiparang ong·china chatro chatrirangko didiangaha.
Ia program-ko ong·atani bidingo, South West Garo Hills NTCP aro NOHP-ni District Nodal Officer Dr Cornelious R Marak talate on·angengon, ta·makkuko jakkalanichi mandena, mongsongbate bi·sarangna aro dal·drobaenggipa chadamberangna namgijaniko ra·bana man·ani gimin aganangaha. Ta·makku jakkalaoniko bi·sarangko chel·chake rakkina gita ma·a paarangko, skigiparangko aro songni nokni dilgiparangko nangrime kam ka·china gitaba Dr Marak didiangaha.
Ia program-ko ong·atanio, skulni chatro chatrirang, ta·makku aro pekatgipa samrangko jakkalanichi mandena namgijako ra·bana man·ani gimin dakmesokangaha.
Ia tom·anio, Ampati-ni SDMHO Dr Ladya M Marak, chadamberangni gisepo man·ronggipa sabisi sakanchirangni gimin agan-talatanirangko on·angenba, chatro chatrirangko pangnan rongtal an·tale aro an·seng baljokgipa ong·e janggi tangchina ku·pattianirangko on·angaha.
Ia tom·anio, Chief Legal Aid Defence Counsel Sengatchi Marak-ba jinmana aganprakengon, Cigarettes and Other Tobacco Products Act (COTPA)-ni ning·o dongimin niamrangni gimin talate on·angenba, a·jao ta·makku palaniko champengna nangengani gimin aganangaha.
Ia World No Tobacco Day-ko manianio dongpae jinmana aganprakanggipa gipin manderangara, Garobadha PHC-ni Medical Officer-in-Charge Dr Timchida A Marak, Junior Rural Development Officer (JRDO) CN Marak, Ampati Civil Hospital-ni Dental Surgeon Dr Sonami G Sangma aro gipinrang ong·a.
Ia program-ko ong·atani bak gita quiz competition-koba chatro chatrirangna ong·atangaha aro chegiparangna boksisrangko on·angaha.
Ia World No Tobacco Day-ko manianio Tuberculosis aro dingtang dingtang sabisi sakanchirangna porikkarangkoba ra·e niangjolaha.
