EGH-ni silni dollongko ton 9-na batgipa garirangko re·na champengata

WILLIAMNAGAR: East Garo Hills a·jani, Songsak C&RD Block-ni ning·o ong·gipa Songkama jolo  donggipa sil-ni dollong, dal·dalgipa aro jrimgipa garirangni re·ruraenganichi nosto ong·angengahani gimin, ia dollong  gita tons 9 na bate jrimgipa garirangni re·ruraenganiko, Bharatiya Nagarik Suraksha  Sanhita (BNSS)-ni Section 163-ni ning·o East Garo Hills District Administration, champengatangaha.
Nosto ong·angenggipa dollong gita dal·dalgipa aro jrimgipa garirangni re·ruraenganina  simsak nirokaniko dakgija skatang re·rurana on·anichi rang·gitik obosta ong·anirangna aro manderangni naljokanina kenchakani ong·a aro ranggitik dollongni be·gruanichi jolni aro  wilwilao donggipa songrangna dingtang dingtang nangchongmotgipa kamrangna re·ruraengganina neng·nikani ong·gen ine talatangaha. Uni gimin manderangni janggini naljokanina aro mikkangchi dollongni chu·gimik nosto ong·anichi dingtang dingtang neng·nikanirangko ra·baaniko champengna ja·ku de·engon, chu·gimik dollongko taripilna man·ku dipet,  East Garo Hills a·jani, Songsak  C&RD Block-ni ning·o ong·gipa Songkama jolo donggipa silni dollong gita ton 9 na bate jrimgipa garirang re·ruraaniko dakpajachina,  Bharatiya Nagarik Suraksha Sanhita (BNSS)  2023,-ni Section 163-o pangchake, East Garo Hills a·jani, Deputy Commissioner  R. P. Marak  mikrakataniko on·angaha.
Uni gisepon nambata nirok simsakaniko dakna, ja·rikna nangchongmotgiparangko u·iatangskaengon, dal·dalgipa truck-rangni dollonggita napbana skang uni  jrimaniko ma·sina gita sepangbatgipa government  weighbridge-rango toe nianiko dakchina. Ton 9-na bate jrimgipa garirang traffic  enforcement branch-ni gita dikdiksana jakkalchengna u·iatgimin ramarangko jakkalskachina. Una agreba,  daito gnanggipa officialrangna mikrakataniko on·angenba, Executive Engineer, PWD Resubelpara,  dollongona napbachakram damgni cholgugarangon  champengatani gimin manderangna  mikrakataniko on·gipa  signboard-rangko donchina, aro Superintendent of Police aro gipin daito gnanggipa authority-rang ge·etanirangko namgipa bewalo ja·rike niamrango pangchake dakna nanggni kamrangko ka·pachina u·iatangaha.
Uni gisepon ia ge·etanirangko manigija  pe·giparangni kosako, Bharatiya Nyaya Sanhita (BNS) 2023-ni Section 223-o ning·o dongimin niamrango pangchake ja·ku deaniko dakgen ineba East Garo Hills a·jani, Deputy Commissioner  R.P. Marak u·iatangaha.