TURA: Garo Hills-o bading chiwale cha·enggipa aro contract kamrangko ka·enggipa Non-Tribal-rang, mitamde Trading for Non-Tribal (TNT) licence gri kam ka·e cha·enga aro mitamrangde gitcham bilsirango tarigipa licence-rangkon renew ka·e jakkalenga ine Federation of Khasi Jaintia & Garo People (FKJGP) Garo Hills Zone matnangatenba, TNT licence-rangko on·anio niamko ja·rikchina aro Garo Hills-o bading chiwale cha·enggipa gipin jatrangoniko TNT licence-rangko sandijringchina Garo Hills Autonomous District Council (GHADC)-ni Deputy Chief Executive Membor aro Taxation-ni EM in-charge Stevie M Marak-ko didiataha.
FKJGP-GHZ-ni president Pritam Arengh-ni parakatani gitade, GHADC-o Taxation department-ni TNT licence-rangko on·ani bidingo uamang bang·en badi ka·anirangko man·soaha aro ian Garo Hills-ni Tribal bading chiwalgiparagna aro sorkari contractor-rangna nangchakeaniko ra·baani gita ong·engachim.
“Bading chiwale cha·enggipa aro sorkario register ka·gipa contractor gipin jatrangoni bang·an TNT licence gri kamrangko ka·e cha·enga ine chinga dingtang dingtang manderangoniko badi ka·anirangko man·soaha. Indian Constitution-ni Sixth Schedule ning·o ong·ani gimin Garo Hills-o bading chiwale aro contract ka·e cha·enggipa gipin jatrang (Non-Tribal) TNT licence dongna nangtelgipa ong·a indiba TNT licence gri gipin jatrangni bading chiwale aro contract-rangko ka·e cha·aniara niamni a·palo ong·enga,” ine FKJGP GHZ-ni president parakataha.
Tribal ong·gijagipa mitam manderang, gitcham bilsirango tarigipa TNT licence-rangko renew ka·e jakkalenga ine matnangatskaengon, TNT licence-kode bading chiwalani mingsa kamna ba sorkari contract-na changsanasan tarina man·aia aro bilsiantian, kamni kri gital taritaina nangaia ine Arengh parakataha.
“Garo Hills-ni Tribal chadamberangba bading chiwalani kamrangna aro sorkari contract-rangna Professional Tax Clearance Certificate-ko ra·anio gital dake gamna nangrongaia aro renew ka·e jakkalna man·jani gimin Non-Tribal-rang aro company-rangba TNT licence-rangko renew ka·e jakkalna man·na nangja indiba kamni kri gital dake licence-ko tarina nanga,” ine FKJGP GHZ-ni president parakataha.
Tribal ong·gijagipa je manderang ba contractor-rang, bading chiwalani kam ba sorkari contract-ni bimingrangko janapgija TNT licence-rangko renew ka·ahachim, ua pilak licence-rangkon den·galpilchina aro gital dake TNT licence-na dorgastoko galpilna gita ge·etaniko on·chinaba FKJGP GHZ dabiangaha.
