TURA: Jagimikna ong·atenggipa ‘Khet Bachao Abhiyan’ campaign-ko June-ni 1 tariko, South West Garo Hills a·jani Sonamite songo, All India Coordinated Research Project on Women in Agriculture (AICRP-WIA)-ni ning·o Tura College of Community Science (CCS)-ni ong·atanggipa Focused Group Discussion aro Input Distribution Program-o a·bachengate on·angaha.
Ia program-ko Tura CCS-ni Dean In-charge Dr Namita Singh dilangaha aro ia program-ko ong·atani bidingo jinmana talate on·angengon, gama ge·anirangko nambatatanichi, somoi gita science-ni bewalo gama ge·anirangko jako ra·anichi aro songo noko donggipa manderangni bakrimanichi, mi a·palrangko naljoke rakkina nangani gimin aganangaha.
Ia ‘Khet Bachao Abhiyan’ campaign-ko game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo game ge·e cha·giparangna u·iatna aro talate on·na gita June 1 tarikoni 30 tarikona ong·atenga.
Ia program-ko ong·atanio, game ge·e cha·giparang, songni nokni dilgiparang, Tura CCS-ni official-rang aro chatro chatrirangba bak ra·angtokaha.
