Selsella jolo poultry farm-ko rongtale chalaijaenga ine NGO-rang badi ka·a

TURA: West Garo Hills a·jani Selsella Pathangre-o chalaienggipa poultry farm ba do·o jilaniko, niam gita chalaijaengani a·sel songni nokni manderang neng·nikanirangko man·na nangenga aro ian samtangtango donggipa chiring chibisikrangkoba nosto ka·enga ine Selsella jolo donggipa dingtang dingtang dolrangni nangrime bikotgipa All Selsella NGOs Alliance (ASNA), West Garo Hills a·jani Deputy Commissioner-na badi ka·doangaha.
Ia All Selsella NGOs Alliance-o bakrimenggipa dolrangara, Selsella-ni GSU, FKJGP, ADE, ASWA, NGCO aro ANYO dolrang ong·a.
Deputy Commissioner-na badi ka·e sedoatgipa chittio Selsella NGO-rangni parakatani gitade, ia poultry farm ba do·o jilani baganko rongtal an·tale chalaijaengani a·sel aro do·o ki·irangko name galjaengani a·sel, samba jolo donggipa songni manderangna chaktogijagipa bibako ong·atenga aro unbaksana mikka waani somoirangode, ia do·o jilgipa biaponi mitchibegipa moilarang, sambao donggipa chiring chibisikrangonasa jokangengani gimin ian chiring chibisikrangkoba nosto ka·a gita ong·enga.
“Selsella Pathangre songo chalaienggipa poultry farm-ko rongtale chalaijaengani a·sel samba jolrango donggipa dingtang dingtang songni manderang neng·nikanirangko chagrongna nangtokenga aro wachini somoirangode ia poultry farm-ni moilarang, samba jolrango donggipa chiring chibisikrangonasa jokangengani gimin ian chiring chibisikrangkoba nosto ka·a gita ong·e, chiring chibisikrango pangchake janggi tangenggipa manderangna nangchakeaniko ra·baenga,” ine ASNA-ni dilgiparang parakataha.
Poultry farm-ko rongtal an·talani gri chalaianiara, Environment Protection Act, 1986 aro Water (Prevention and Control of Pollution) Act, 1974-ko pe·ani ong·enga ine janapatskaengon, “Chinga ia biapo poultry farm chalaianikode jegalenga ong·ja indiba samba jolrango donggipa songni manderangna aro samtangtango ong·telaigiparangna maming nangchakeaniko ra·bajana gita ia farm-ko rongtale chalaichinasa nangnikenga,” ine ASNA-ni dilgiparang parakatenba, ia poultry farm-ni kosako ta·raken ain gita ja·kurangko de·china aro poultry farm-ko rongtale chalaina gita ge·etaniko on·china Deputy Commissioner-ko didiataha.