AMPATI: ‘Building Stronger Connections, Delivering Better Governance’ ine pangchakaniko donenba Budbar salo, South West Garo Hills a·jani Zikzak C&RD Block office, dingtangmancha BDO Connect program-ko Zikzak Block-o ong·atangaha aro ia program-o dingtang dingtang sorkari official-rang, songni nokni dilgiparang aro jolo songdongenggipa manderangba bak ra·angtokaha.
Manderangna kamrangko dangdike on·anio nambate ka·na, parak ong·ani dongna aro manderangni neng·nikanirangko ba nanganirangko knatime ra·enba, chu·sokate on·na miksonganio ia BDO Connect program-ko ong·atangaha.
Ia BDO Connect program-ko ong·atanio dingtang dingtang sorkari department-rangni officer-rang bak ra·e, songo noko namroro silroroani, sorkarini scheme-rang, lekka pora, an·seng baljokani, janggi tangani cholrang aro gipin kamrangni bidingo manderangni sing·anirangna aganchakanirangko aro talatanirangko on·angaha.
Ia program-ko ong·atanio Zikzak Block-ni ning·o donggipa dingtang dingtang songni manderang, songo noko ong·enggipa obostarangko, mongsongbate sorkarini kamrango chu·sokgijanirangko, officer-rangna agan-janape on·angaha. Manderangni ia tom·anio janapanggipa kamrangoni mongsonggiparangara, bijoli aro ringani chirangni gimin ong·bataha.
Manderangni nangnikani aro neng·nikanirangna dingtang dingtang department-ni officer-rang, nangani kri agan-talatanirangko on·angskaaha.
Je kamrangkon ia tom·anio officer-rang talate ba chu·sokate on·na man·jahachim, uandakgipa kamrangko dongimin somoi gita chu·sokatna ba nanga gita ja·kurangko de·skana department officer-rang ku·rachakangskaaha.
