TURA: Re·anggipa May-ni 26 tariko, Edenbari jolo bijoli tariengmiting somoio, rang·gitik bijoli salako man·e siangna nanggipa MePDCL-ni lineman Dalben Sangma-ni nokdangna, gong 52,000 tangkako compensation dake gamanina Federation of Khasi Jaintia & Garo People (FKJGP) Garo Hills Zone (GHZ), suk ong·gijaniko parakataha.
Edenbari jolo nosto ong·gipa bijoli line-ko tariengmiting somoio, rang·san bijoliko watpilatani a·sel ia lineman, bijoli sala man·e sina nangahachim.
“Garo Hills-o MePDCL-o kam ka·enggiparangna maming naljokanirang dongjaengani gimin chinga suk ong·gijaniko parakna ska. Re·anggipa May 26 tarikosan MePDCL-ni lineman Dalben Sangma, bijoli sala man·e janggitangko gimaatna nangaha. MePDCL-o kam ka·enggipa manderangni iandake sina nanganirangko knasona chinga namen ka·a be·a. Iana skang, Dalu joloba, lineman saksako kam ka·engmiting somoio bijoli salahachim indiba rasong gnangbee uko unbaksa kam ka·rimgipa sakgipin mande jokatna man·aha,” ine FKJGP GHZ parakataha.
Dalben Sangma-ni siani ja·man uni nokdangna gong 52,000 tangkakosan compensation dake on·aha ineba FKJGP GHZ, suk ong·gijaniko parakataha.
“Sianggipa mandeni nokdangna ka·sae on·anina chinga department-ko mittelna ska indiba uni kam ka·ani aro on·kanganiko niatgenchimode ia tangkarangara namen komibea ine chinga nikna man·a. Dalben Sangma-ko uni kamtango gisik nanganina ma·sitoka, uni gimin uni ka·donganio aro kamna gisiko nanganio pangchake, uni nokdangna tangka on·aniko bariatchina chinga department-ko mol·molatenga,” ine FKJGP GHZ parakataha.
Bijoli tarigipa lineman-rang, bijoli siani somoirango, mongsongbate da·o gita wachini somoirango neng·takpilgija kamrangko ka·na nanga ine janapatengon, lineman-rangni kamrangko ka·anio naljokanirangko on·china aro pilak nanga bosturangko on·china gita FKJGP, MePDCL-ko didiataha.
Sianggipa lineman-na gong 52,000-ko compensation dake on·anina FKJGP jegala
Date:
Share post:
