Chonchongipa koela a·kolrangko chalaina ma·mongni ra·chakaniko sengkuenga: CM

SHILLONG: A·doko chonchongipa koela a·kolrangkoba chalaina gita ma·mong sorkario mol·molatani ja·man namgipa aganchakanirangko man·soaha indiba ma·mong sorkarioni bon·kame ra·chakkujaskalde, ia koela a·kolrangko chalaiani bidingo chu·gimikko talatna man·kujawa ine Budbar salo, a·dokni Chief Minister Conrad K Sangma parakataha.
“Chinga namgipa aganchakanirangko man·engaha indiba ma·mong sorkarioni bon·kame ra·chakaniko man·kujaskal anga chu·gimikkode talate on·na man·kujawa,” ine Sangma, hectare 100-na bate chonbatgipa koela a·kolrangko chalaiani bidingo India sorkari baksa agangrikenggipani gimin parakataha.
Ian manderangna janggi tangani cholko on·ani, naljokaniko on·ani aro samtangtango ong·telaigiparangko chel·chakani on·anio apsan ong·na nangengani gimin ong·a ine janapatengon, “Da·o dipet iana namgipa aganchakanide dongkuja. Ian rakbegipa kam ong·gen indiba chinga neng·nikanirang baksa kamko ka·enga,” ine Chief Minister aganaha.
Chief Minister-ni aganani gitade, koela bikotaniara manderangna janggi tangani cholko on·aniode namen nangchongmotgipa ong·enga indiba apsan somoion sorkari, koela bikotgipa manderangni naljokani aro samtangtango ong·telaigiparangna nangchakeanikoba nina nangenga.
“Kamrangko ka·anio, namgipa cholkode man·chipjanaba gnang aro pilak kamon neng·nikanirangde dongaigen,” ine Chief Minister aganenba, ma·mong sorkarini ra·chakanichi da·o a·doko scientific mining ba niamo pangchake koela bikotanikode a·bachengaha ine parakataha.
“Da·o dipet hectare 100 ong·gipa dal·dalgipa koela a·damrangko chalainasa India sorkari on·engkua aro agangimin gitan dambri koela a·kolrangkode chalaina on·manaha aro ianoni damgittamkode chalaiengaha,” ine Sangma aganaha.
Niam gita chalaienggipa koela a·damrangoniko bang·en koelarangko gipin biaprangona salna a·bachengaha ineba Chief Minister parakataha.
Chonchongipa koela a·damrangko chalaienggiparangnasa sorkari cholrangko on·na nangnikbatenga ine janapatengon, “Chonchongipa koela a·damrang, jerangan ma·mong sorkarini nanga gita ong·jaengachim, uandakgipa koela a·damrangko chalaina gita sorkari agangrikenga aro India sorkarini permission-ko man·na krengenga,” ine Chief Minister aganaha.
Galchipgimin koela a·damrango bang·en manderang sina nangahani gimin janapatengon, “A·ja damsaon dam 21,000-na baten galchipgimin koela a·damrang donga aro a·dok gimikniko changopatgenchimode dam 25,000-mangni gita koela a·damrang dongnaba gnang,” ine Sangma aganaha.