TB sagiparangna dakchakaniko on·na MLA ku·rachaka
RESUBELPARA: Bristibar salo, Jan Bhagidari TB Mukt Bharat Abhiyan 100-Day Campaign (Phase II) program-ko North Garo Hills a·jani Mendipathar-o donggipa Multi Purpose Cooperative Society Hall-o ong·atangaha.
Ia program-ko East Garo Hills a·jani National Tuberculosis Elimination Programme (NTEP) ong·ataha aro ia program-o jolni dilgiparang, ASHA-rang, chatro chatrirang aro namgniko man·enggipa manderang bak ra·angtokaha. Tuberculosis (TB) saaniko bon·atna gita manderangna u·iataniko mangrakbatatna aro ia kamo jolo songdongenggipa manderangkoba bak ra·atna miksonganio ia program-ko ong·ataha.
Re·anggipa March jani 24 tariko a·bachengatgipa 100 Day TB Mukt Bharat Campaign-ni ning·o dingtang dingtang awareness program-rangko, North Garo Hills a·jani dingtang dingtang primary health centre (PHC), community health centre (CHC) aro sub-centre-rango ong·atengachim.
Ia program-ko ong·atanio, Mendipathar-ni MLA aro Meghalaya Tourism Development Corporation-ni Chairman Marthon J Sangma, mongsonggipa sokgipa ong·e jinmana aganprakangengon, TB-ara sanna man·gipa sabisi ong·a aro songadam nokadam pilakon TB-ko porikka ra·e nina cholrang dongaha ine parakataha. 2030 bilsini gisepon TB-ko bon·atna gita North Garo Hills a·jao, dingtang dingtang dolrang baksa bakrime kamrangko ka·engani giminba Sangma, agan-talatanirangko on·angaha. TB sagiparangna sanna banani aro nirok sandianirangko on·anio dakchakanirangko on·na gitaba ia tom·anio ua ku·rachakangaha.
Ia tom·anio, North Garo Hills a·jani Additional Deputy Commissioner Rezia Sangma-ba dongpae jinmana aganprakangengon, songtangtango aro gittimtangtango TB saani bidingo manderangna u·iatna gita an·tangtangko on·kange kam ka·china chatro chatrirangko didiangaha. TB saaniko sanna bananio sorkarini on·enggipa cholrangko ra·china aro TB saaniko bon·atsranganio bakrimaniko on·china gitaba ua didiangaha.
Ia program-ko ong·atanio dongpae aganprakanggipa gipin manderangara, East aro North Garo Hills a·jani District Tuberculosis Officer Dr Chrissie Pearly M Sangma, North Garo Hills a·jani District Medical & Health Officer Dr Priya Sengse R Sangma aro gipinrang ong·a.
Ia program-ko ong·atani bak gita free medical check-up camp-koba ong·atangaha.
