Khasi ku·sikko Eighth Schedule-o napatchina dabianiko nina bakan committee-ko songgen
SHILLONG: Bristibar salo, Khasi Students Union (KSU)-ni dilgiparang, Union Home Minister Amit Shah-ko gronge, dingtang dingtang dabianirangko gisik ra·ate on·angtaiaha aro ia tom·anio Union Minister, KSU-ni bang·bata dabianirangko niatna ku·rachakaniko on·angaha.
KSU-ni general secretary Reuben Najiar-ni kobor ra·timgiparangna parakatani gitade, Assam aro Meghalaya a·dokni simarango ong·enggipa golmalrangko namatna a·dok sorkarirangni agangrikani chu·sokjagenchimode ma·mong sorkari jako ra·skagen aro Khasi ku·sikko Constitution-ni Eighth Schedule-o napatani bidingo chanchina gita bakan Supreme Court-ni gitcham judge-rangchi committee-ko songgen ine Union Home Minister Amit Shah, ku·rachakaniko on·angaha.
Bristibar salo, North Eastern Council (NEC)-ni chang 73-gipa Plenary-o bak ra·na Shillong-ona re·baanio Union Home Minister, KSU-ni dilgiparangko gronge agangrikengmitingo, ia ku·rachakaniko on·angaha.
Union Minister-ko gronge agangrikani ja·man kobor ra·timgiparangna talataniko on·angengon, ia tom·anio KSU-ni dilgiparang, minggittam dabianirangko gisik ra·atpile on·angaha ine Najiar parakataha.
Ia minggittam dabianirangoni skanggipade Inner Line Permit (ILP)-na dabianian ong·a ine janapatengon, ILP-na a·dokni manderang ru·uta bilsirangonin dabiengachim ine uamang Union Minister-na janape on·aha ine KSU-ni general secretary parakataha.
“West Bengal aro Assam a·dokrango niam gri songdongenggipa manderangko a·rikgalengoba ia manderang Bangladesh a·songona re·angpiljaenga indiba gipin biaprangosa songdong a·chaskaenga. Meghalaya a·dokode an·tangtangko chel·chakna maming niamrangan dongja, uni gimin chonchongipa Khasi, Jaintia aro Garo jatni manderangko chel·chakna ILP-ko ra·gatna nangenga,” ine Najiar aganaha.
Simarango ong·enggipa golmalrangni gimin janapatskaengon, meligrikna man·jaenggipa biaprango Assam-ni manderang, da·o Meghalaya-ni manderangko sinjetbatna jotton ka·enga ine KSU-ni general secretary aganaha.
“Lapangap aro gipin simarango Assam-ni manderang, niamrangko pe·e, Meghalaya a·dokni manderangko dokkol ka·na jotton ka·enga,” ine Najiar aganaha.
KSU general secretary-ni parakatani gitade, simarango ong·enggipa golmalrangko namatna a·dok sorkarirangni agangrikanirang chu·sokjaenga ine nikgenchimode, ia kamo ma·mong sorkari jak on·gen ine Amit Shah, uamangna ku·rachakaniko on·angaha.
Khasi ku·sikko Constitution-ni Eighth Schedule-o napatchina dabienggipani bidingo chanchirimengon, ia kamko da·o ma·mong sorkari niengkua aro bakan iana Supreme Court-ni gitcham judge-rangchi committee-ko songgen ine Union Home Minister, KSU-ni dilgiparangna ku·rachakaniko on·angaha.
“Re·baenggipa jarangni gisepon kamoni neng·takgimin Supreme Court-ni judge-rangchi committee-ko songgen. Ming 100-mangni gita ku·sikrangko Eighth Schedule-o napatchina dabitokengani gimin ia committee, niroke ja·kuko de·anggen,” ine Shah, KSU-ni dilgiparangna parakataha.
KSU-ni kamde a·dokni nanganirangko mesoke on·anisan ong·aia indiba ia kamrangko niroke chu·sokatanide a·dok aro ma·mong sorkarirangni kamsa ong·a ine janapatengon, “ILP-na dabie indita bilsirangna jingjengatanirangko aro so·sojengjeng ong·anirangko nikna man·aha. ILP-ko on·genma on·jawa iani gimin da·o ma·mong sorkari talate on·na nanga,” ine Najiar aganaha.
2019 bilsio Manipur a·dokba ILP-ko man·ahani gimin re·baenggipa bilsirango ba jarango Meghalaya a·dokba ILP-ko man·gen ineba KSU-ni dilgiparang, ka·dongchakenganiko parakataha.
