GHADC-o Judicial officer-na Judge-ko donchina Lawyers’ union dabia

TURA: GHADC-ni District Council Judiciary-ni ning·o Distirct Council Court-na Judicial Officer dake Judge-ko ta·rake songchina All Garo Hills Advocate’s Union (AGHAU) dabbiangaha jedakode advocate-rang aro manderangni gisepgriko dingtang dingtang chagronggipa neng·nikanirangko namatna man·gen.
GHADC-ni CEM-na mol·molani lekkako on·anio union janapataha, Judge aro Judicial officer-rangni dongsimjanichi raiko man·a senge dongenggipa jemangni mamlarang Court-o dongchipenggiparangna raiko man·a namen rakbegipa ong·enga unbaksana biljrimaniko on·dapa ine aganaha.
Union-ni parakatani gitade, Garo Hills Autonomous District Council-ni ning·o kakketgipa bichalko on·a District Council Judiciary-ko songna mongsong gamchatgipa ong·a aro denggu dakgiparangna, me·chikko noko donaniko chel·chakna, customary niamko aro Garo Hills-ni manderangko gipinrangni bak dakaniko chel·chakna mongsonggipa kamrangko ka·a.
“Chinga advocate-rang aro raiko man·a senge dongenggipaoni matnanganirangko man·soaha, jeon mol·molanirang, nikjumangsoanirang, bang·a dorgastorang, matchotna am·enggipa mamlarang aro gipin gital petition ka·giparangko ra·chakgenma ma ra·chakanganio dingtang dingtang neng·nikanirangko chagronggenma aro regular Judge-ni donggijanina tariangengama. Niamni gita on·atgipa somoini gisepgriko Court-ona re·bana ian bang·bate neng·nikaniko nikangna man·enga jeon rai on·ako sengenggiparang niam gita dakchakaniko nangenggiparang neng·nikaniko chagrongenga,” ine parakataha.
Union-ni parakatani gitade, Executive Member/Chief Executive Member-ni office-rang aro Land aro Revenue-ni in-charge unbaksana Settlement Officer aro Assistant Settlement Officer, a·a revenue, a·ako namgrikate on·gipa, patta-rang, Nokmarangko songani, A·king bak dakani aro uamangni a·jani ning·o donggiparangni gisepgriko gipin revenue mamlarang baksa kam ka·angkuenga aro nirokangenga. Judge-ni office-o aro Judicial Officer-ni biap bangbang ong·e dongenganichi District Council Judiciary-ko chalaienggipana namen neng·nikani ong·enga jeon uamangni a·jarango judicial-ni kam ka·anirang ga·akenganiko nikna man·enga, iani a·sel kakketgipa raiko man·a sengenggiparang raiko man·a neng·nikaniko chagrongenga.
District Council Court, GHADC, Tura-o Judge-ko donkamna songani kamrangko matchotatchina aro ja·ku de·na nanggipa department-ko union mol·molangaha aro District Council Judiciary-ni ning·o Judicial Officer-ni bangbang dongenggipa biapko gapatchina dabiangaha.