TURA: Tura songjinmako nitogipa, rona-rotogipa aro pilaknan dongna dongtogipa biap ong·atna miksonge, Tura songjinmaoni adita chadamberangni a·bachengatgipa Tura Clean-Up Mission, Tura songjinmako rongtalatna re·ongkataha.
Sonibar sal June 06, 2026-oni songsalko rongtal-an·talatna a·bachengatenba, ia chadamberangni dol Tura songjinmao damsa niksengbegipa rona rotogipa biap Tura, Williampoint-oni jabolrangko chu·gimik rongtalataha. Ia biapo bang·a manderangni skatang jabol galgiminrangko rongtalatenba, chadamberang sakanti chasongska chadamberangko aro biapona robagipa sakantiko mikkangchi skatang jabolrangko galjachina mol·molanga.
Songsalko aro an·tangtangni songjinmako rongtal-an·talatna mangsonge re·ongkatengon, Tura Clean-Up Mission- Tura songjinmani gipin mongsonggipa biaprangkoba jasani gisepo changgni rongtalatgen ine parakanga. Indake Tura songjinmako rongtalatna gita June 06, 2026 oni a·bachengate mikkangchi songjinmani dingtang dingtang jolrangoba iandakgipa apsan kamkon ka·anggen ine janapangkua.
Tura Clean-Up Mission, re·baenggipa salrango Tura songjinmako rongtal-an·talanio niksenggipa ong·atna ja·ku de·engon sakanti dal·a-chona songdonggiparang an·tangtangni noktangona agreba gipin biaprangkoba rongtal-an·tale rakkina jotton ka·china mol·molangkua.
