MENDIPATHAR: A·doko petrol, diesel aro LPG-ni damrangko bariatsimsimanichi songdonggipa manderang neng·nikaniko chagrongna nangengani gimin Meghalaya Pradesh Youth Congress (MPYC), Ma·mong aro A·dok sorkarini kosako meja Sonibaro Mendipathar-o jinma re·jomaniko ong·atenba jegalangaha.
MPYC-ni President, Timjim Mominni agan-talatani gitade, ia somoini bako a·dokni bang·bata songjinmao dongenggipa manderang cha·ani-ringa bosturangna agreba gipin gipin bosturangni damrang bariroroani a·sel neng·nikaniko man·a baksana petrol, diesel, aro LPG-ni damrangko tang·doatsimsimani a·sel neng·nikani ong·bataha, mongsongbate pringna attam-na kam ka·e cha·giparang neng·nikani chagrongna nangbatenga. A·doko to-ni dam bariahaon, songsalo manderangni re·ruraani korosrang aro nangchongmotgipa bosturangni damrangba tang·chapaia, uani a·sel kangal-cholgri manderang mongsongbate neng·nikaniko man·na nangenga, aro uamangni neng·nikanirangna sorkari mamingdakeba sko saja ineba MPYC dilgipa matnange aganaha.
Apsandake a·doko NPP-ni dilanichi rikenggipa MDA sorkariba songdonggipa manderangni neng·nikanirangko olgrokatna jotton ka·ani maming dongja ineba MPYC matnange aganaha.
Unomitingon, NEET porikkani question paper joksoani giminba MPYC, ma·mong sorkariko matanangaha aro ian chadamberangni re·mikkanganiko ja·pea gita ong·a ineba suk ong·gijaniko parakaha, jeon ia a·sel ong·anio adita chadamberang uamangni janggirangko ra·aonaba sokpilahachim.
Chadamberangni mikkangchi re·mikkanganio nosto ong·jana gita songdonggipa sakantina Sorkari, daito ra·e kam ka·na nanga ineba MPYC didiaha.
