CHOKPOT: South Garo Hills, Chokpot-o Degree College rikenggipako matchote on·china Chokpot jolni nangrimgimin NGO-rang didiangaha. Ia Chokpot Degree College-ko 2023 bilsio-oni rikna a·bachengachim indiba da·alonaba matchotgija 10 percent mangni gitasan rikenba galchipe donenga, jeon ia college-ko rikna gita kror 2.81 tangka-paisarangko chamgipaoniko kror 2 mangni gita tangkakode okmanahachim ine nangrimgimin NGO-rang parakataha. Ia a·selrangni bidingo contractor baksa agangrikon chong·motgipa Detail Project Report (DPR)-ko angna on·kujaengani gimin anga iako matchote rikna man·kujaenga ine contractor aganchakahachim.
Indake ong·engon, ia Degree College-ko matchote rike on·genchimode ian Chokpot aro uni wilwilani chadamberangna dakchakbeani ong·gnokchim, maina uamang nambata chubata gadango poraipana chol ong·gnokchim ine aganengon, Chokpot jolo ian skanggipa Degree College ong·e, Chokpot jolni chadamberangna dingtang biaprangchi re·angna nanggija a·jatangon skie ra·na chol ong·genchim aro ma·a-parangnaba tangka-koros bon·anirang komikalgnokchim. Unigimin ia Degree College-ko matchote rike on·china gita NGO-rang, a·dok sorkariko aro contractor-ko Chokpot didiangaha.
Salgro-Salaram a·doko lekka-porako tang·doatna miksonganio, ia Chokpot Degree College-ko rikna gita North East Council (NEC)-oni kror 2.81 tangka-paisako korosna chamatahachim aro ia college-ko rikna gita batanggimin 2023 bilsio a·dokni Chief Minister Conrad K Sangma pangchakaniko songe on·anangahachim.
Chokpot Degree College-ko rikgija galchipenga ine NGO-rang matnanga
Date:
Share post:
