TURA: Budbar salo, West Garo Hills a·jani ICAR-KVK, Khet Bachao Abhiyan campaign-ni bidingo awareness program-ko ong·atangaha.
Ia ‘Khet Bachao Abhiyan’ campaign-ko game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo game ge·e cha·giparangna u·iatna aro talate on·na gita June 1 tarikoni 30 tarikona ma·mong sorkarini Agriculture & Farmers Welfare Ministry ong·atenga.
Ia Khet Bachao Abhiyan-ni bidingo awareness program-ko ong·atanio, Tura-ni MDC aro BJP Meghalaya-ni state vice president Bernard N Marak, mongsonggipa sokgipa ong·e bak ra·angaha aro tom·anio ua jinmana aganprakangengon, gama ge·anirangko dakanio pangnan ong·telaigipa a·salrangko jakkalchina aro gama ge·anirangchi nambata biterangko man·na gita joltango man·gipa cholrangkon jakkalchina, songni manderangko aro game ge·e cha·giparangko didiangaha.
Game ge·e cha·giparangna a·arangko name rakkina aro ong·telaigipa a·salrangchi gama ge·anirangko dakna gita skie on·engani gimin ua dingtangmancha ICAR-KVK-koba mittelpilangaha. Atmanirbhar Krishi-ni bidingo janapangengon, Meghalaya a·dokko gama ge·anio gipin a·dokrango pangchakna nanggijagipa a·dok ong·atna nangengani gimin Marak aganangaha.
Ia awareness program-ko ong·atani bak gita KVK-ni scientist-rang, ‘Benefits of Green Manuring Crops for Soil Health Management’-ni bidingo training session-koba ong·ate, game ge·e cha·giparangna agan-talatanirangko on·angaha.
Ia program-ko ong·atanio, West Garo Hills ATMA-ni Deputy Project Director Prodeep Sangma, KVK-ni official-rang, aro game ge·e cha·giparangba bang·en bak ra·angtokaha.
Ia program-ko ong·atani bak gita dingtang dingtang me·su samjakni bitchilrangkoba game ge·e cha·giparangna suale on·angaha.
