Bilsi 74-ni gisepo skanggipa changna GHADC-o kam ka·giparang service rule donggnok
TURA: Garo Hills Autonomous District Council (GHADC)-ko 1952 bilsio songchengaoni bilsi 74-ni ja·man da·o bon·kame, GHADC-o kam ka·enggiparangna service rule-ko donna gita GHADC-ni Executive Committee, Service Rule Bill-ko pass ka·angaha.
Ia bill-ko GHADC-ni Executive Committee, Mongolbar aro Budbar salgnina tom·e chanchirimangenba pass ka·aha.
Iani bidingo Garo Hills United Alliance (GHUA) Executive Committee-na ku·wattimgipa aro Kharkutta-ni MDC Cherak W Momin, kobor ra·timgiparangna talate on·angengon, 1952 bilsionin a·bachenge da·alona kingkingan GHADC-o kam ka·giparangna service rule-rangko tarina man·chipkujani gimin Executive Committee, Mongolbar aro Budbar salrango salgnina tom·e chanchirimangenba, ia Bill-ko pass ka·na man·aha ine parakataha.
Ia Service Rule Bill-ko Executive Committee pass ka·ahani gimin re·baenggipa jao GHADC-ni session-ko ong·ataniona ra·anggen aro uno jinma ra·chakahaode, a·dokni Governor-ona uni ra·chakaniko man·na gita watatgnok ineba Momin parakataha.
EC-ni salgnina tom·anio, GHADC-ni dingtang dingtang kajinarangko gamna gita online portal-ko kulina gitaba tik ka·e donangaha ine Momin parakataha.
“A·a pattarangko tarianio, chel·a biaprango donggipa manderangba, GHADC-onasa re·bae pattarangko tarina aro kajinarangko gamna nangtokenga, uni giminsa chel·a biaprango donggipa manderangna kamrangko altubatatna gita chinga patta tariani aro kajina gamaniko online-chiba a·bachengatna manchie, ia portal-ko a·bachengataha,” ine Momin parakataha.
GHADC-na dingtang electoral roll-ko tariani bidingo janapatskaengon, dingtang electoral roll-ko tarina gita je committee-kon, cholrangko sandina songe on·ahachim, ia committee-ni bon·kamgipa report-ko ia jani gisepon on·gnok aro ia committee-ni report-ko man·ahaon, GHADC-na dingtang electoral roll-ko tarina kamko a·bachengatgnok ine GHUA-na ku·wattimgipa aro Executive Membor Momin parakataha.
Garo Customary Law (GCL)-ko ra·gatani bidingo janapatskaengon, je committee-rangkon ia GCL-ni bidingo chanchirimdilna aro kamko ka·dilna donahachim, ia committee-rang, re·baenggipa sal somoirango tom·anirangko ong·atna sienga ine Momin parakataha.
