Dadenggre-o bijoli watani kamko MePDCL jako ra·pilchina dabie jinma re·joma

DADENGGRE: West Garo Hills a·jani Dadenggre Civil Sub-Division ning·o, bijoli watani kamko SAI Computers Limited company jako ra·a intalan bijoli on·a tik ong·jaenga aro bill-rangba skangona gadanggni gadang gittam bate sokengani a·sel, bijoli jakkalenggipa manderang neng·nikanirangko chagrongna nangtokenga ine Dadenggre jolni manderangna bijoliko on·anio SAI Computers company-ko ra·gale, MePDCL an·tangan jako ra·taipilchina dabie, Dadenggre jolo songdongenggipa manderang, dingtang dingtang dolrang baksa nangrime Bristibar salo, jinma tom·bimonge re·jomaniko ong·atangaha.
Jinma re·jomaniko ong·atna skang, Dadenggre Bazar-o jinma tom·bimonganiko ong·ataha aro uni ja·man, Dadenggre Bazar-oni Block sepango donggipa MePDCL office mikkang gita jinma re·jome jegalanirangko dakangtokaha.
Jinma re·jomaniko ong·atna skang, jinma tom·bimonganio dingtang dingtang dilgiparang aganprakengon, Dadenggre-o bijoli on·aniko 2025 bilsini November jao, SAI Computers Ltd company jako ra·a intalan bijoliko on·anirang tik ong·srangjaha aro iani bidingo re·anggipa May-ni 2 tariko, Dadenggre-ni MLA Rupa M Marak baksa, Dadenggre Circuit House-o tom·e sing·sandianirangko dakangon, kamrangko namdapatna gita SAI Computers company-ni officer-rang, ku·rachake ra·angahachim indiba da·alonan maming namdapaniko nikna man·kujaenga ine parakangtokaha.
Ia sal somoirango porikkarangna poraienggipa chatro chatrirang, bijolirang tik ong·jaengani a·sel neng·nikanirangko chagrongna nangtokengani gimin jolo songdongenggipa manderangni neng·nikanirangko namatna gita SAI Computers Ltd company-ko ra·galsrange, MePDCL an·tangtangan jako ra·pilna nangchongmota ineba ia tom·anio dingtang dingtang dilgiparang dabiangtokaha.
Iani bidingo jolni dilgiparang aro dingtang dingtang dolrang, a·dokni Chief Minister Conrad K Sangma-na memorandum-ko on·anggen ineba ia tom·anio jinma tik ka·e donangaha.
Dadenggre-o bijolini kamko ka·enggipa manderang chu·ongjaengani giminba ia tom·anio dingtang dingtang dilgiparang, sorkariko sing·doangaha aro ta·raken kam ka·giparangko chu·onga gita rakkie on·china dabiangaha.
Ia jinma tom·bimonge re·jomaniko ong·atanio, Dadenggre, Dama A·sim aro dingtang dingtang songrangoni bang·bea manderang, dingtang dingtang skulni chatro chatrirang, Nokma-Sanirang, budepa butchumarang aro ramram manderangba bak ra·angtokaha.