NEW DELHI: Meghalaya a·dokni GSDP, 2018 bilsio gong kror 29,508 ong·aoni 2024-2025 bilsio gong kror 59,626-ona tang·doangahani gimin ian Meghalaya a·dokko India a·songo ta·rakbatsrange dal·roroenggipa a·dok gita mesokani ong·aha ine Bristibar salo, Meghalaya a·dokni Chief Minister Conrad K Sangma parakatenba, pilak salgro salaram a·dokrangnan Externally Aided Project (EAP)-rangna tangka paisa chamaniko bariatchina ma·mong sorkariko didiataha.
NITI Aayog-ni chang 11-gipa General Council tom·aniko ong·atanio aganprakengon, EAP-ni ning·o tangka paisa chamaniko bariatgenchimode, US dollar billion 1-na batgipa project-rangkoba tarie on·na man·aigenchim ine Sangma aganaha.
“16th Finance Commission-ni somoio salgro salaram a·dokrangna aro a·briarigipa a·dokrangna EAP-na tangka paisa chamaniko bariata ong·ode chinga chingni dal·roroaniko apsan daken rakkiangkuna man·gen,” ine Chief Minister aganaha.
Sangma-ni aganani gitade, Meghalaya gita chonchongipa a·dokrangna EAP-ni ning·o tangka paisa chamaniko bariatgenchimode, nangchongmotgipa kamrangna aro manderangni namgnina chu·gimik project-rangko jakkalna man·gen.
“2022 aro 2025 bilsini gisepo chingni EAP-o 50 percent CAGR ong·aniara, chonchongipa a·dokrangba cholko on·genchimode kamrangko chu·sokate mesokna man·a ine mesokani ong·a,” ine Sangma aganaha.
Meghalaya-ni miksongani ba nisanko donanian, 2032 bilsini gisepo India a·songni nambatsranggipa dam 10 a·dokrangoni damsa ong·atanian ong·enga ine janapatengon, ia niksamsoaniko chu·sokatna gita Meghalaya sorkari, Mission 10-ni ning·o namroro silroroaniko ra·bana rake kamko ka·enga ine Chief Minister parakataha.
Ia tom·anio bak ra·na skang, a·dokni Chief Minister-ko, Bharat Mandapam-o ong·atanggipa National Democratic Allliance (NDA)-ni tom·bimonganioba dingtang dingtang dilgiparang rimchaksotokaha.
EAP-ni ning·o tangka chamaniko bariatchina Conrad, ma·mong sorkariko didia
Date:
Share post:
