SHILLONG: Meghalaya a·dokni pilak biaprangon National People’s Party (NPP)-na kam ka·enggipa manderang, rakbee kamrangko ka·engani gimin da·o ong·atna sienggipa Shillong Parliamentary by-election-o NPP-an chegipa ong·aigen ine Bristibar salo, a·dokni Deputy Chief Minister aro NPP-ni dilgipa Sniawbhalang Dhar, an·tangni ka·dongchakenganiko parakataha.
Iani bidingo, kobor ra·timgipa manderang baksa agangrikengon, party-na kam ka·enggiparangni rakbee kamko ka·anichi ia by-election-oba uamang chu·sokgipa ong·na ka·dongenga ine Dhar parakataha.
“Chingni manderangni bakrimanichi chinga ia Shillong Parliamentary by-election-ko chinga chena ka·dongenga. Party-ni gita chinga rake kamko ka·na nangenga aro anga party-ni pilak unit-rangko aro dingtang dingtang constituency-rango party-na kam ka·enggiparangko mittelpilna ska. NPP-ni pilak bipekrangan rakbee kamko ka·aha, uni gimin da·o ong·na sienggipa by-election-oba ian party-na namgipa chinrang ong·enga,” ine Dhar aganaha.
Shillong Lok Sabha by-election-na me·chikko candidate dake seokjani gimin sing·anina aganchakaniko on·angengon, NPP-ni candidate-ko seokengon pangnan party-ni gisepo name chanchirimchengesa seoka ine NPP-ni national vice president parakataha.
“NPP-de maming saloba kosakoni seokaigipa party ong·ja indiba dam 36 constituency-rango donggipa pilak unit-rangni nangnikanirangkosa nichenga. Uamang bang·batan Dr DRL Nonglait-ko nangnikaha aro chinga uamangni nangnikako ra·chakaha,” ine Dhar aganaha.
Khasi-Jaintia Hills jolrango Voice of the People’s Party (VPP)-ni mitam dilgiparang, NPP-o naptokenga ine koborrangko man·soenggipani bidingo janapatengon, “Anga an·tangba iako nikaha, mongsongbate Jaintia Hills a·jao VPP-na chakenggipa manderang komiroroangengaha. Khasi Hills-oba salantian VPP-ni member-rang komiroroangengaha maina Khasi aro Jaintia Hills-ni manderang, uamangni kamrangko nikmanaha,” ine Dhar aganaha.
