TURA: Re·anggipa Mongolbar salni bako West Garo Hills a·jani Dalu Block-ni ning·ogipa Kherapara songo an·o donggipa ma·gipa saksako songni manderang aro Health Worker-rang naljokataha. Indake a·ding a·kong, rama-jal·ang namgijagipa km 10 mang chel·gipa biaponiko an·o donggipa me·chikko Kherapara PHC-ona naljoke sokatnagaha.
A·no donggipa ma·gipani saani koborko Health Worker-rang knasoenba ANM Merybell B Marak, MLHP Ritngenlang M Umlong, aro Health Supervisor Lilysa Ch. Sangma- a·damona sokange sana-bananiko dakeaha indakoba nambata sanna-bananiko nangenggipa ma·gipako ta·rake PHC-ona sokatna man·osa ma·gipa aro atchikugijagipa bi·sako naljokatna man·gen ine aganahachim, uni ja·mano songni-nokni manderang ma·gipako PHC-ona sokatna gita wa·seko watenba gari man·gipa biapona ripee ra·baaha aro rama tong·saoni Ambulance-o PHC-ona sale ra·baskaaha.
Indake PHC-ona sokatbaani ja·mano ua ma·gipa, 3.3kg ong·gipa bi·sako man·aha indake ma·gipa me·chik bi·sa sakgnian naljokatako man·aha.
Ian Health Worker-rangni an·tangtangni daitoko skang done sakanti saknaa man·enggipa manderangna nambata sanna-bananiko on·chengna uamangni on·kange kam ka·ani gimin o ng·aha aro songantini manderangna naljokaniko on·na uamangni re·mikkanganian ong·a ine a·gipi Health Official sakanti Health Worker-rangko de·mittelangaha.
Iandake nambata sanna-bananiko on·na man·na gita songni manderangni aro Health Worker-rangni dakchakgrimaniko nikna man·e a·jani dingtang dingtang Department-ni Official-rang aro songni dilgiparangko mittelangaha.
Kherapara-o Health Workers, songni manderang an·o donggipa ma·gipako naljokata
Date:
Share post:
