AMPATI: Robibar walni 11:00 bajimango, South West Garo Hills a·jani Betasing C&RD Block ning·o donggipa Joyfar songni nokdang ge·sako mongma chadrapaha indiba rasong gnangbee, ia a·sel ong·anio darangba saknaanirangko man·jaha ine kobor on·aha.
Koborko on·ani gitade, ia mongma matte, Joyfar songni saksa Ketaki Hajong minggipa me·chikni nokko chadrapeaha aro ia nokni babilsi, me·dik-sam·dikrang aro bosturangko donchakgipa kuturi nosto ka·ako man·aha. Ia nokdango, ma·a paa aro bi·sarangko man·chape gimik sakdok manderang dongachim indiba rasong gnangbee, uamangoni darangba saknaanirangko man·jaha.
Da·o dipet ia nokdangna maming dakchakanirangko on·na nangani dongkuja ine official-rang parakataha.
Indake ong·genchimoba, sorkari official-rang, nanga gita ja·kurangko de·na man·na gita ia obostani bidingo nambate nipiltaianirangko aro hisapanirangko dakengkua ine kobor on·aha.
